Ramiz Mehdiyev: “Mən onun işinəqarışmıram, nə edirsiniz edin, bizə toxunmayın”

“Baku Steel Company” şirkətinin rəhbəri Rasim Məmmədovun həbs olunduğu haqda oxucularımıza məlumat vermişdik.

“Hürriyyət”in əldə etdiyimi son informasiyaya görə,“Baku Steel Company” şirkətinin fəaliyyətinin araşdırılması zamanı R.Məmmədovun  yüz milyonlarla manat dövlət vəsaitini qanunsuz yollarla ələ keçirdiyi aydın olub. Bu səbəbdən də həmin vəsaitin ondan geri alınaraq, dövlət büdcəsinə qaytarıldığı iddia edilir.

Qeyd edək ki, “Baku Steel Company” şirkətinin qeyri-rəsmi sahibi kimi Prezident Administrasiyasının sabiq rəhbəri, AMEA prezidenti Ramiz Mehdiyevin adı hallanır. Mənbənin sözlərinə görə, Rasim Məmmədovun həbsindən sonra R.Mehdiyev “mən onun işinə qarışmıram, nə edirsiniz edin, bizə toxunmayın”, – deyib.

Xatırladaq ki, dünən Səbail Rayon Məhkəməsində “Baku Steel Company”şirkətinin rəhbəri Rasim Məmmədov barəsində həbs qətimkan tədbirinin seçilməsi ilə bağlı təqdimata baxılıb.

Təqdimat təmin edilib və Rasim Məmmədov barəsində 4 ay müddətinə həbs qətimkan tədbiri seçilib.

Qeyd edək ki, R.Məmmədov Cinayət Məcəlləsinin 308.2-ci (Vəzifə səlahiyyətlərindən sui-istifadə), 178.4-cü (Dələduzluq, külli miqdarda ziyan vurmaqla törədildikdə) və 179.4-cü (Mənimsəmə, xüsusilə külli miqdarda ziyan vurmaqla törədildikdə) maddələri ilə ittiham irəli sürülüb.

İddia olunur ki, o, Ramiz Mehdiyevin kürəkəninin və oğlunun şikayəti əsasında tutulub.