Almaniya, BMT-nin İqlim Konfransı (COP29) çərçivəsində, noyabrın 11-də Bakıda başlayacaq tədbirdə dörd əsas nazirlik tərəfindən təmsil olunacaq. Bu barədə Almaniyanın Ətraf Mühit, Təbiəti Mühafizə, Atom Təhlükəsizliyi və İstehlakçıların Hüquqlarının Müdafiəsi Nazirliyi bəyan edib. Konfransda əsas diqqət iqlim layihələrinin maliyyələşdirilməsinə yönəldiləcək.

Gündəlikdə həmçinin keçən il keçirilmiş konfransda qəbul edilmiş qətnamələrin, xüsusilə enerji keçidi, iqlim dəyişikliyinin təsirlərinin azaldılması və uyğunlaşma tədbirlərinin icrası məsələləri müzakirə olunacaq.

Forumda Almaniya nümayəndə heyətinə Xarici İşlər naziri Annalena Berbok, vitse-kansler və İqtisadiyyat naziri Robert Habek, İnkişaf naziri Svenya Şulçe və Ətraf Mühit naziri Şteffi Lemke rəhbərlik edəcək.

Müzakirələrdə əsas mövzulardan biri, inkişaf etmiş ölkələrin 2020-ci ildən etibarən iqlim layihələri üçün illik 100 milyard dollar ayırmaq öhdəliyini yerinə yetirməməsindən yaranan maliyyə boşluğu olacaq. Berbok iqtisadi imkanları olan ölkələrin prosesə qoşulmasının vacibliyini vurğulayıb və qeyd edib ki, "birlikdə ən həssas ölkələrin transformasiyasını dəstəkləyə bilərik." O əlavə edib ki, dövlət vəsaitləri kifayət etməyəcək və özəl sektorun investisiyalarını artırmaq üçün stimullar yaradılmalıdır.

Habek Almaniyanın bərpa olunan enerji sahəsindəki irəliləyişini qeyd edərək bildirib ki, ölkənin elektrik enerjisinin yarıdan çoxu artıq külək və günəş enerjisindən əldə olunur. "COP28-də qərara alındığı kimi, 2030-cu ilə qədər bərpa olunan enerjilərin payını üç dəfə artırmaq tamamilə mümkündür," – deyə o əlavə edib və bərpa olunan enerjilərin milli enerji sisteminə inteqrasiyasının gücləndirilməsinin zəruriliyini vurğulayıb.

Almaniya kansleri Olaf Şolts COP29 başlamazdan iki gün əvvəl Azərbaycan Prezidenti İlham Əliyevlə telefon danışığı aparıb və konfransın uğurla keçəcəyinə ümid etdiyini ifadə edib. Bu barədə Almaniya hökumətinin rəsmi nümayəndəsi Kristiane Hoffman məlumat verib.

COP29 konfransı noyabrın 22-dək davam edəcək və tədbirdə 40-50 min nümayəndənin iştirakı gözlənilir. İştirakçılar arasında BMT və Aİ-yə üzv bütün ölkələrin hökumət nümayəndələri, Vatikan, Yeni Zelandiyanın asılı əraziləri olan Niue və Kuk adaları, həmçinin Fələstin nümayəndə heyəti olacaq.