Nazif  Tağıyev Birinci vise-prezidentə müraciət etdi: “Xaricdə  müalicə olunmam üçün  25-30  min  ABŞ  dolları  və  Sizin  şəxsi  nəzarətiniz  lazımdır”

“14 ildir  kömək  istəmədiyim  ünvan  qalmadı.  Evində  brilliant  qaşlarla  bəzədilmiş  qızıl  çıl-çıraq  asıb,  “büdcədə  sənin  müalicən  üçün  pul  yoxdur” - deyənlərlə,  bizə  verilən  mənzilləri  başımıza  qaxınc  edənlərlə rastlaşdım…”

Quba  şəhəri, Əzizbəyov  küçəsi, ev  52, mənzil 22-də yaşayan Tağıyev  Nazif  Hacıverdi oğlu redaksiyamıza şikayət məktubu daxil olub. Qəzetimiz vasitəsilə Birinci vitse-prezident Mehriban Əliyevaya müraqciət edən şikayətçi yazır:
“Hörmətli  Mehriban  xanım!
Mən II qrup Qarabağ  müharibəsi  əliliyəm.  Ehtiyyatda  olan  kapitanam.  Müharibəyə  qədər Quba  Təhsil  şöbəsində  fizika  fənni  üzrə  metodist  işləmişəm. Üç körpə övladımı  evdə  qoyub, Vətənin  müdafiəsinə yollandım.  Döyüşlərdə  ayrı-ayrı  vaxtlarda  düşmənin 7 (yeddi) tank və PDM-ni və xeyli sayda canlı qüvvəsini məhv etmişəm. Çoxlu döyüş  texnikasını qənimət kimi ələ keçirmişəm. Ordumuzun  formalaşmasında əlimdən  gələni  etmişəm. 
İki dəfə qapalı kəllə-beyin  travması  almışam. Axırıncı  kontuziyanı  biz  kəşfiyyatdan  qayıdanda  öz  tankımız  bizi  səhvən  vuranda  almışam.  Bunların  hamısı  məhkəmədə  öz  təsdiqini  tapıb.  2008-ci  ildə  mən  “ Vətən  uğrunda “  medalına  layiq  görülmüşəm.
1997-ci  ildə  ordudan  tərxis  olundum  və  yenidən  müəllim  işləməyə  başladım.  1998-2002-ci  illərdə  mən  və  İsmayılov  Mülkəmir  müəllimin birgə hazırladığı  şagirdlər  Dünya  Olimpiadsında  Respublikamızı  Fizika  fənni üzrə müvəffəqiyyətlə  təmsil  etdilər. 2002-ci ildə hətta qızıl  medala  da  layiq  görüldülər.  Nədənsə,  rəsmi  orqanlar  tərəfindən  biz  iki  müəllimə  quru  “sağ ol”  deyən  tapılmadı.  Hətta  mənə “istəmirsənsə,  işləmə”  dedilər.  
Dünya,  SSRİ,  Çin  olimpiadalarından  seçilmiş  360  məsələni  tərcümə  və  həll  etdik.  Onları  kitab  şəklində  ərsəyə  gətirmək  üçün  vəsaitimiz  olmadı.  O  vaxt  bizim  çox  məharətlə  gördüyümüz  bu  olimpiada  işini  indi  “ölü” nöqtədən  tərpətmək  üçün 2 dəfə  və  hər  reysində 50  nəfər  müəllimi  uzun  müddətə  İsrailə  ezamiyyətə  göndəriblər.  Bizə  bir  müəllimə  çəkilən  ezamiyyət  xərci  kifayət  idi  ki,  o  kitabı  çap  edə  bilək.
“Fizika kursu”  kitabının  müəllifiyəm.  Kitab  X – XI  sinif  şagirdləri  üçün  nəzərdə  tutulub.  Keçən  il  Coğrafiya,  Kimya  və  Fizika  fənləri  üzrə  Təhsil  Nazirliyinin  xətti  ilə  hazırlanan  “Situasiya  testləri”  kitabının   hazırlanmasında  fəal  və  təmənnasız  iştirak  etdim.
Mənə  məlum  olmayan  yollarla  qidama  qatılan  radioaktiv – kimyəvi  zəhər  orqanizmimdə  ciddi  fəsadlar  törətməyə  başladı.  Müəllim  kimi  fəaliyyətimi  dayandırmalı  oldum.  2006-cı  ildə  mənə “bağırsaq  xərçəngi” diaqnozu  qoyuldu.  Bu  səhv  qoyulan  diaqnoz  məni  ömürlük şikəst  etdi.  

2011-ci  ildə  Türkiyə  səhiyyəsi  vasitəsi  ilə  apardığımız  laborator  analizləri  təsdiq  etdi  ki,  məndə  ümumiyyətlə  xərçəng  olmayıb.  Yalnız  həmin  zəhərin  izləri  aşkarlandı.
Mənim  müalicəm  və  bərpam  mümkündür.  Lakin  Türkiyə  və  Almaniyada.  14 ildir  kömək  istəmədiyim  ünvan  qalmadı.  Evində  brilliant  qaşlarla  bəzədilmiş  qızıl  çıl-çıraq  asıb,  “büdcədə  sənin  müalicən  üçün  pul  yoxdur” - deyənlərlə,  bizə  verilən  mənzilləri  başımıza  qaxınc  edənlərlə  və  s.  kişilərlə rastlaşdım.
Qısası  qeyrətli  bir  kişi  tapılmadı  ki,  mənim  müalicəmi  və  bərpamı  öz  öhdəsinə  götürsün.
Mehriban xanım!
Ona  görə  Sizə  müraciət  edirəm.  Elə  yaşımdır ki, (62  yaşım  var)  mənə  hansısa  təltif,  kiminsə “ sağ olu “,  kimlərinsə  məsuliyyətə  cəlb  olunması  qətiyyən  lazım  deyil. Mənə  müalicəm  və  sağlamlığımın  qismən  də  olsa  bərpası  lazımdır.  Ömrümün  qalan  hissəsini  insan  kimi  yaşayım.  Sadə  həyat  yaşayan  mənim  üçün  aldığım  təqaüd  və  pensiya  tamamilə  kifayətdir. 
Mehriban  xanım!
Mənim  xaricdə  - Türkiyə  və  ya  Almaniyada  müalicəmi  və  bərpamı  təşkil  edərsinizmi ?  Bunun  üçün  25-30  min  ABŞ  dolları  və  Sizin  şəxsi  nəzarətiniz  lazımdır”.
Muxalifet.az