Azərbaycanın hüquq-mühafizə orqanları Ağstafa rayon icra hakimiyyətinin başçısı Nizaməddin Quliyevi həbs edib. Virtualaz.org hüquq-mühafizə orqanlarındakı mənbələrə istinadən xəbər verir ki, əməliyyat zamanı onun müavini Ramiz Tatarov da saxlanılıb. Hazırda onların mənzillərində axtarışlar aparılır. Nizaməddin Quliyev bundan əvvəl Goranboy rayon İcra Hakimiyyətinin başçısı idi və cəmi bir neçə ay əvvəl-2019-cu ilin aprelində onun yeri dəyişdirilərək Ağstafa rayonuna başçı təyin edilmişdi. Bildirilir ki, N.Quliyev dünən axşam saatlarında Dövlət Təhlükəsizlik Xidməti əməkdaşları tərəfindən rüşvət alarkən cinayət başında yaxalanıb. Hazırda DTX-da saxlanılan başçının ətrafında axtarış və araşdırmalar davam etdirilir. Gün ərzində hadisəylə bağlı rəsmi açıqlama veriləcək. N.Quliyevin oğlu Ramin Quliyev Nərimanov rayon Məhkəməsində hakim işləyir, digər oğlu isə Baş Prokurorluğun Korrupsiyaya Qarşı Mübarizə Baş İdarəsində vəzifə tutur. *** Ağstafa rayon İcra hakimiyyətinin başçısı həbs edilib. Unikal.org xəbər verir ki, icra başçısı Quliyev Nizaməddin Məhəmməd oğlu və müavini Tatarov Ramiz Cahangir oğlu iş başında yaxalanıb. İH-dən isə bildirilib ki, Nizaməddin Quliyev ezamiyyətə gedib. Qeyd edək ki, Nizaməddin Quliyev Azərbaycan Respublikasının Prezidenti cənab İlham Əliyevin 05.04.2019-ci il tarixli Sərəncamı ilə Ağstafa rayonu İcra hakimiyyətinin başçısı vəzifəsinə təyin edilib. Yeni Azərbaycan Partiyasının üzvüdür. Ailəlidir, 3 övladı var.