Hərəkatın partiya sədrliyinə namizədi də müəyyənləşdirilib
 
Respublikaçı Alternativ (REAL) Hərəkatının qurultayının oktyabrın sonunda keçirilməsi planlaşdırır.
Bu barədə “Report”a hərəkatın icraçı katibi Natiq Cəfərli məlumat verib.
O bildirib ki, qurultay dəqiq gününün təyin edilməməsi tədbirin keçiriləcəyi yerin müəyyənləşməməsi ilə bağlıdır: “Qurultayın keçirilməsi ilə bağlı bir neçə yerə müraciət etmişik. Böyük zalı olan yer lazımdır, çünki yüzlərlə insan iştirak edəcək. Yerlə bağlı məsələ həll edildikdən sonra qurultayın dəqiq günü elan ediləcək”.
N.Cəfərli qeyd edib ki, qurultayı Bakının Əmircan qəsəbəsində yerləşən Səttar Bəhlulzadə adına Mədəniyyət Sarayında da keçirmək mümkündür.
O deyib ki, Respublikaçı Alternativ Hərəkatının partiya sədrliyinə namizədi hazırda həbsdə olan İlqar Məmmədovdur: “Qurultay nümayəndələrindən kimsə öz şəxsi təşəbbüsü ilə sədrliyə namizəd olacaqsa, bu, normal qarşılanacaq. Hələlik İlqar Məmmədovdan başqa namizədimiz yoxdur. Özü də buna razılıq verib. Bütün addımlar İlqar Məmmədovla razılaşdırılıb”.
N.Cəfərli əlavə edib ki, qurultayda partiyanın orqanları müəyyənləşəcək, təşkilatın Məclisi və İdarə Heyəti seçiləcək, proqram sənədləri qəbul olunacaq, o cümlədən partiyanın Nizamnaməsi qəbul ediləcək.