Milli Məclisin VI çağırış deputatı olmuş İqbal Məmmədova məxsus "Lerik Broyler" Məhdud Məsuliyyətli Cəmiyyəti (MMC) fəaliyyətini dayandırıb.

Muxalifet.az "qaynarinfo"ya istinadən  xəbər verir ki, İqbal Məmmədov deputat mandatını itirdikdən sonra onun digər biznes layihələri ilə yanaşı, "Lerik Broyler" MMC-də də ciddi maliyyə problemləri yaranıb.

Şirkət bir neçə aydır fəaliyyət göstərmir. Bildirilir ki, işçilər uzun müddətdir əmək haqlarını ala bilmirlər.

Aparılan araşdırmaya əsasən, MMC-nin Dövlət Vergi Xidmətinin 6 saylı Ərazi Vergilər Baş İdarəsinə 255 340,07 manat vergi borcu mövcuddur.

Məlumata görə, İqbal Məmmədovun qardaşı oğlu Orxan Nərimanlı direktor vəzifəsindən azad edilib. Bir neçə ay əvvəl "Lerik Broyler" MMC-nin direktoru vəzifəsinə Emil Şiriyev təyin olunub.

Sayt məsələ ilə bağlı "Lerik Broyler" MMC-nin Emin adlı nümayəndəsi ilə əlaqə saxlayıb. Onun şirkətin İqbal Məmmədovla əlaqəsi barədə suala belə reaksiya verib:

"Sizə nə dəxli var? Şirkət İqbal Məmmədovdan çıxıb, ya çıxmayıb. İşçilərə əmək haqqı verilməməsi ilə bağlı məsələnin də ağsaqqala heç bir aidiyyatı yoxdur. İqbal Məmmədovun qardaşı oğlu Orxan Nərimanlının da ona bağlılığı yoxdur. Axmaq-axmaq danışırsız. 8 aydır "Lerik Broyler" işləmir. Siz şirkətin niyə işləməməsi barədə maraqlanın".