Prezident İlham Əliyevin sərəncamı ilə Dövlət Gömrük Komitəsinin (DGK) sədri vəzifəsindən azad olunan Səfər Mehdiyevin qaynı, DGK-nin nəzdindəki "Azterminalkompleks” İstehsalat Birliyinin rəis müavini Zeynal Tarquluyevin həbs olunması xəbəri həqiqəti əks etdirmir.

Muxalifet.az xəbər verir ki, bu barədə Bakupost.az saytı yazıb.

Bildirililib ki, o, Dövlət Təhlükəsizliyi Xidmətində başlanılmış cinayət işi üzrə istintaqa cəlb edilib.

Dindirilib, izahatı alınıb, amma sərbəst buraxılıb. İstintaq müddətində onun əməlində cinayət aşkarlanarsa, həbs oluna bilər.

Qeyd edək ki, Azərbaycan Respublikasının gömrük qanunvericiliyinin pozulması ilə müşayiət olunan, vətəndaşların hüquqlarına, dövlətin qanunla qorunan mənafelərinə zərər vuran, dövlət orqanlarının fəaliyyətinə kölgə salan qanunsuz əməllərə yol verilməsinə dair daxil olmuş məlumatlar əsasında 10 iyun 2022-ci il tarixdə Dövlət Təhlükəsizliyi Xidmətində başlanılmış cinayət işi üzrə kompleks əməliyyat-istintaq tədbirləri həyata keçirilib.

Araşdırmalar nəticəsində Azərbaycan Respublikası Dövlət Gömrük Komitəsi yanında “Azərterminalkompleks” birliyinin direktoru vəzifəsində işləyən Xəlilov Ehtiram Səyyaf oğlu, Komitənin Enerji Resursları və Dəniz Nəqliyyatında Baş Gömrük İdarəsinin rəis müavini Babayev Rəşad Tofiq oğlu və Gömrük Tariflərinin Tənzimlənməsi və Ödənişlər Baş İdarəsinin Yol vergiləri və icazə blanklarına nəzarət şöbəsinin rəisi vəzifəsində işləyən Səfərov Şükür İsbəndiyar oğlu, Dövlət Gömrük Komitəsinin Əməliyyat-istintaq Baş İdarəsinin rəisi vəzifəsində işləyən Rəsulov Məsum Eynalı oğlu həbs olunub.

Bu faktlar aşkarlandıqdan sonra İyulun 16-da Prezident İlham Əliyevin sərəncamı ilə Dövlət Gömrük Komitəsinin Səfər Mehdiyev vəzifəsindən azad edilib.

Hazırda istintaq-əməliyyat tədbirləri davam etdirilir.

***19.07.2022 09:56

İyulun 16-da Prezident İlham Əliyevin sərəncamı ilə Dövlət Gömrük Komitəsinin (DGK) sədri vəzifəsindən azad olunan Səfər Mehdiyevin qaynı Zeynal Tarquluyev dünən saxlanılıb.
Hurriyyet.az mötəbər mənbələrə istinadən xəbər verir ki, DGK-nın nəzdindəki “Azterminalkompleks” İstehsalat Birliyinin rəis müavini olan Zeynal Tarquliyev yeznəsi Səfər Mehdiyevin “qara kassası” hesab olunurdu.
Bəzi mənbələr iddia edir ki, Zeynal Tarquluyev əlində olan rəsmi və qeyri-rəsmi səlahiyyətlərdən istifadə edərək iş adamlarından qanunsuz olaraq 100 milyonlarla manat toplayıb. İstisna olunmur ki, onun həbsi də məhz bununla bağlıdır.
Mənbənin sözlərinə görə, hazırda DGK-da keçmiş sədr Səfər Mehdiyevin onlarla yaxın qohumu çalışır ki, onların hər birinin qanunsuz fəaliyyəti ilə bağlı ciddi araşdırma aparılır və yaxın günlərdə yeni həbslər dalğasının olacağı istisna olunmur.  
Redaksiyadan: Qarşı tərəfin mövqeyini dərc etməyə hazırıq.