Tovuz rayonu, Qovlar qəsəbəsi sakini, hazırda Bakı şəhərində yaşayan Quliyev Ayxan Vahid oğlu tərəfindən Muxalifet.az-ın redaksiyasına şikayət məktubu daxil olub. Saytımız vasitəsilə prezident İlham Əliyevə, daxili işlər naziri Vilayət Eyvazova müraciət edən şikayətçi yazır:
“Hörmətli Prezident!
Hörmətli Nazir!
Xahiş edirəm ki, Nərimanov Rayon Polis İdarəsinin 16-cı Polis Bölməsinin rəisi Xəyal Şükürov tərəfindən ələ keçirilmiş 7 000 (yeddi min) manat pulumun qaytarılmasına köməkilk göstərəsiniz.
Bildirirəm ki, Sizə və aidiyyəti qurumlara şikayət ərizəsi ilə müraciət edərək Nərimanov Rayon Polis İdrəsinin 16-cı Polis Bölməsinin rəisi Xəyal Şükürov və həmin bölmənin əməkdaşı olan Kamil Şərifovun məndən 2 000 manat pulu rüşvət olaraq aldıqlarını və mənə qarşı dələduzluq edən, etibarımdan sui-istifadə edərək 40 000 (qırx min) manatdan artıq pulumu ələ keçirən Qurbanov Emil İlqar oğlu ilə əlbir olmalarını, cinayətkarı müdafiə etdiklərini, onun barəsində heç bir qanuni tədbir görmədiklərini bildirmişdim.
Həmin müraciətim əsasında Bakı Şəhər Baş Polis İdarəsinin Daxili Təhqiqatlar Şöbəsində araşdırılma aparılaraq (aldığım şifahi məlumata əsasən, çünki mənə heç bir rəsmi məlumat verilməyib), niyəsə ancaq bölmənin əməkdaşı Kamil Şərifova töhmət verilib, ancaq 16-cı polis bölməsinin rəisi Xəyal Şükürov barəsində ümumiyyətlə heç bir tədbir görülməyib və mənim pulum alınaraq özümə qaytarılmayıb. 
Hörmətli Prezident!
Hörmətli Nazir!
Bildirirəm ki, mənim ilkin şikayətimdən sonra Qurbanov Emil İlqar oğlu ilə əlaqə saxlayan zaman Emil mənə polis əməkdaşı Kamil Şərifovun çəkdiyi video-görüntümü atdı və mənə 12 000 (on iki min) manat pul verdiyini, şikayət etməklə heç nə əldə etməyəcəyimi bildirdi(həmin video görüntü və mesajlar məndə var).
İlk öncə polis əməkdaşı Kamil Şərifovun çəkdiyi və Emilin mənə atdığı video-görüntüyə aydınlıq gətirmək istəyirəm. Belə ki, Emilin atası İlqar Qurbanov polis əməkdaşı Kamil Şərifov və təhqiqatçı Allahyarın yanında 16-cı Polis Bölməsində otaqda   mənə 7 000 (yeddi min) manat pul verdikdən sonra Kamil Şərifov məni digər xidməti otağa keçirtdi. Orda məndən Emildən pulun hamısının alınması üçün əvvəlcədən 16-cı PB-nin rəisi Xəyal Şükürova 3000 manat pul verməyi bildirdi.
Mən buna razılaşmadığım üçün o,  Xəyal Şükürova zəng etdi, telefon danışığından sonra rəisin 2 000  manata razı olduğunu dedi və əgər etiraz etsəm pulu məndən alıb Emilin atasına qaytaracaqlarını bildirdi. Mən buna görə məcbur qalıb Kamil Şərifova 2 000  manat rüşvət verdim. Bundan sonra mən bölmədən çıxıb gedən zaman Kamil Şərifov gəlib mənə dedi ki, video çəkliş edəcəm. sən orada de ki, Emilin atası mənə 12000 manat verib.
Əvvəl razı olmasam da, sonradan Kamil Şərifovun həqiqətən mənim xeyrim üçün çalışdığını düşünüb razılaşdım və video-görüntünü çəkdi (görüntüyə diqqətlə baxılsa, həmin vaxt əlimdə 5 000 (beş min) manat olduğu görünür). Lakin daha sonra Kamil Şərifovla whatsapp yazışmaları və telefon danışıqlarında Kamil mənə “yaxşı olacağını” bildirsə də, sonra həmin 5 000 manatı mənə vermədi. Mən Kamil Şərifovun pulumu Emilin atasından ala bilmədiyini düşündüyüm üçün bu məsələyə əhəmiyyət vermədim və buna görə şikayət ərizəmdə bu barədə heç nə yazmadım. Ancaq mənim şikayətimdən sonra Emil mənə Kamil Şərifovun çəkdiyi video-görüntünü ataraq, mənə 12.000 manat pul verdiyini deyəndə anladım ki, Kamil Şərifov məni aldadıb video-görüntü çəkmiş və mənə verəcəyini bildirərək Emilin atasından özü üçün 5 000 manat pul almışdır.
Eyni zamanda qeyd edim ki, həmin videonu polis əməkdaşı Emil Şərifov çəksə də, bunun Emil tərəfindən lentə alınmasını uydurublar. Ancaq həmin video çəkilən zaman Emil orada olmayıb.
Əgər həmin videonu Emilin çəkibsə, nə üçün  orada onun səsi yoxdu, videoda niyə üzü görünmür?
Hazırda polis əməkdaşı Kamil Şərifov işdən çıxarılıb, sərəncama verilib, digərlərinə töhmət verilib, lakin hələ də pulumu qaytarmayıblar. Çünki bu cinayət əməllərinin başında 16-cı Polis Bölməsinin rəisi Xəyal Şükürov dayanır.
Mən bir vətəndaş olaraq cinayətkarlığıa qarşı mübarizə aparmalı olan polis əməkdaşlarına da güvənə bilməyəcəmsə, kimə güvənib, inanım?! Və çox təəssüflər olsun ki, cənab Prezidentimizin siyasətinə qarşı çıxan, bilərəkdən narazılıq yaratmağa çalışan, rüşvətxor, cinayətkar polis əməkdaşları olan, polis adına ləkə gətirən və polisin gördüyü işlərə kölgə salan 16-cı PB-nin rəisi Xəyal Şükürov və həmin bölmənin əməkdaşı olan Kamil Şərifov hansısa səbəbdən himayə edilərək, müdafiə olunurlar və onların barəsində heç bir qanuni tədbir görülmür.
Hörmətli Prezident!
Hörmətli Nazir!
Sizdən xahiş edirəm, vəzifə səlahiyyətlərindən sui-istifadə edib 7000 manat pulumu ələ keçirmiş 16-cı Polis Bölməsnin rəisi Xəyal Şükürovun və həmin bölmənin əməkdaşı Kamil Şərifovun barəsində ciddi tədbirlər görəsiniz. Həmçinin dələduzluq yolu ilə pulumu ələ keçirmiş Qurbanov Emil İlqar oğlunun barəsində cinayət işinin başlanılıb məsuliyyətə cəlb edilməsinə göstəriş verməyinizi xahiş edirəm”.
Muxalifet.az
Redaksiyadan: Mövzunu davam etdirəcəyik. Yazıda adları qeyd olunan şəxslərin və qurumların mövqeyini də dərc etməyə hazırıq.