Böyük Britaniyanın Daxili İşlər Nazirliyi Birləşmiş Krallığa səfər edən bir sıra ölkələrin vətəndaşlarına qarşı ciddi polis nəzarətinin tətbiqi qaydasını ləğv edib. Xatırladaq ki, indiyədək Azərbaycan bu qadağaların tətbiq edildiyi 44 dövlətin siyahısına daxil idi.
Qafqaz.media “Daily Mail”-ə istinadən bildirir ki, bu yolla Azərbaycanla yanaşı Rusiya, Çin, Ermənistan, Bəhreyn, Belarus, İraq, İran və İordaniyanın da yer aldığı siyahıya daxil olan ölkələrin vətəndaşlarının artıq polisdə qeydiyyatdan keçməyə məcbur edilməsinə ehtiyac qalmayacaq.
Belə ki, ötən həftənin sonunda Daxili İşlər Nazirliyinin, Sərhəd Patrulunun və immiqrasiya orqanlarının ictimaiyyətə açıqlaması olmadan polis qeydiyyatı yoxlamaları qəfil dayandırıldı. Hələ 2016-cı ildə bu sxemin "təhlükəsizlik məqsədləri üçün" lazım olduğu təkid edilirdi.
Britaniya Daxili İşlər Nazirliyinin qərarına reaksiya verən immiqrasiya mütəxəssisi çaşqınlığını belə ifadə edib: “Bu, şokdur. Bu, gecə baş verib. Bu insanlardan əldə edilən məlumatlar əhəmiyyətli bir kəşfiyyat varlığıdır. Onlar ictimai təhlükəsizliyi düşünmürdülər. İndi öz vətəndaşlarını ölkəmizdə oxumağa və işləməyə göndərən Rusiya və Çinlə fikir ayrılıqlarının mərkəzində olduğumuz üçün bu, çılğınlıqdır”.
Ötən gün isə nazirliyin sözçüsü bildirib: “Bu prosedur Birinci Dünya Müharibəsindən başlayır və artıq effektiv deyil. Çünki insanlar Böyük Britaniyaya daxil olmaq üçün müraciət etdikdə polisə verilən məlumatlar artıq Daxili İşlər Nazirliyi tərəfindən toplanır”.
Böyük Britaniyaya səfər edən xarici vətəndaşlar üçün məcburi polis qeydiyyatı qaydası 1909-cu ildən qüvvədədir. O zaman alman casusluğunun qarşısını almaq üçün istifadə olunurdu.
Daxili İşlər Nazirliyinin hansı millətlərin polisdə qeydiyyatdan keçməsinə qərar vermək üçün istifadə etdiyi meyarlar heç vaxt açıqlanmayıb. Lakin bunlar vətəndaşları terrorizm və ya digər cinayətlər məsələsində daha yüksək riskə malik olan və ya immiqrasiya hüquqpozmaları törətmək riski daha yüksək olan ölkələr hesab olunur.
Prosedura bu ölkədə altı aydan çox yaşamaq icazəsi almış 16 yaşdan yuxarı əcnəbi vətəndaşlara şamil edilir. Onlardan polis bölməsinə şəxsən gəlmələri və şəxsiyyət yoxlaması üçün 34 funt sterlinq ödəmələri tələb olunurdu. Onlardan ünvanlarında, adlarında və ya vizalarında hər hansı dəyişiklik və ya iş yeri dəyişikliyi olduğu halda da polisə məlumat vermələri tələb olunurdu.
“Bu, ictimai təhlükəsizlik məsələlərini gündəmə gətirir və Daxili İşlər Nazirliyi yenidən düşünməlidir. Baş verənləri nəzərə alsaq, xüsusən də Rusiya və Çin vətəndaşları üzərində bu cür yoxlamaların ləğvi gülüncdür. Bu, səhv və açıq şəkildə təhlükəlidir”, - Böyük Britaniyanın “Migration Watch” təşkilatının sədri Alp Mehmet deyib.