Müxalifyönlü “İran İnternational” internet saytı ABŞ-ın İranla nüvə sazişinə qayıtmaq üçün razılaşdığını iddia edir.

Qafqaz.media xəbər verir ki, sayt Vaşinqtonun İslam Respublikasının hakimiyyət orqanlarına etdiyi güzəştlərin siyahısını dərc edib.

Məlumata görə, siyahıya İranın 17 bankına qarşı sanksiyaların ləğvi, daha 150 quruma qarşı sanksiyaların yumşaldılması, 120 milyon barel neft alınması, prezident Donald Trampın sərəncamlarının ləğvi və dondurulan 7 milyard dollarlıq aktivlərin “buzunun açılması” daxildir. Bundan əlavə, ABŞ gələcəkdə İranın bütün xarici şirkətlərini sanksiyalardan azad etməyə razılaşıb.

Müqavilə 120 gün ərzində həyata keçirilməli və ölkələr arasında siyasi girovların mübadiləsinə də səbəb olmalıdır.

Eyni zamanda, ABŞ Milli Təhlükəsizlik Şurasının mətbuat katibi Adrian Watson bu məlumatın tamamilə yalan olduğunu bildirib. Bundan əlavə, sayt yazır ki, ABŞ Dövlət Departamentinin sözçüsü Ned Prays İran Beynəlxalq müxbirinin sualına cavab olaraq bu xəbərləri şərh etməkdən imtina edib.