“TİTRƏMƏ, BAŞ AĞRISI...” - Koronavirusa yoluxan Azərbaycanlı jurnalist danışdı

Baxış sayı:
865

Səs İnformasiya Agentliyinin (SİA) Almaniya və Avropa ölkələri üzrə xüsusi müxbiri Şahin Abbasov koronavirus infeksiyasına yoluxub.

Ş.Abbasov bildirib ki, 2 gün öncə virusla bağlı verilən testin cavabını ötən gün axşam alıb: “Ötən gün axşam analizlərimizi verdiyim klinikadan mənə zəng vuraraq nəticələrin müsbət çıxması barədə məlumat verildi və mənə ciddi rejimli ev karanti tətbiq edildi. Ailə üzvlərimdən də bir nəfərin nəticələri müsbət çıxıb. Heç birimizə evdən çölə çıxmağa icazə verilmir”.

Ş.Abbasov söyləyib ki, Almaniyada ev şəraitində karantində olan və alış-veriş etmək imkanı olmayan şəxslərə könüllülər tərəfindən xidmət göstərilir: “Məndən ərzaq ala biləcək şəxsin olub olmadığı soruşuldu. Burada könüllülər var ki, məhz onlar bu fəaliyyətlə məşğuldurlar”.

Jurnalist orada karantin qaydasını pozanlar üçün sərt qayda və cərimələrin tətbiq edildiyini qeyd edib: “Mənə karantin rejimini pozacağım təqdirdə çox böyük məbləğdə, hətta 20 min avroya qədər cərimə kəsiləcəyi ilə bağlı xəbərdarlıq da edildi. Hazırda vəziyyətim stabildir. Ağır qrip əlamətləri hiss olunur. Qızdırma çox yüksək olmasa da, titrətmə, baş ağırısı, yorğunluq, əzələ ağrısı var. Qoxu, dad bilmə hissiyatlarımı tamamilə itirmişəm. Yüksək hərarət, nəfəs alma çətinlikləri, eləcə də boğaz ağrısı simptomları məndə daha yüngül formadadır. 14 gün ərzində qaydalara əməl edəcəyim təqdirdə virusdan canımı qurtara bilərəm”.

Ş.Abbasov vurğulayıb ki, mütəxəssislərin də bildirdiyinə görə, yuxarıda sadalanan simptomları olan hər kəsin məhz koronavirus xəstəsi olduğunu demək yanlış olar: “Ola bilər ki, bu simptomları olan digər şəxs test edər və nəticəsi mənfi olar. Ona görə də düşünürəm ki, burada psixoloji vəziyyət daha önəmlidir. Yayılan çoxlusayda şaiyələrə fikir verməməli, informasiyanı rəsmi mənbədən əldə etmək lazımdır. Almaniyada da insanlara görülən əsas məsləhətlərdən biridir. Yalan xəbərlərdən maksimum dərəcədə uzaq olmaq lazımdır. Çünki hansısa vəziyyətdən istifadə edən fürsətçilər var ki, onlar şaiyələr yaymaqla insanlar arasında naratlıq yaradırlar”./Pravda.az