Rusiya Federasiyasının Qara dəniz donanmasının flaqmanı olan "Moskva" kreyserinə hücumun yeni təfərrüatları məlum olub. İsrailin “Mignews” telekanalı bildirir ki, Rusiya hərbi dairələrində Ukraynanın kreyserə hücumunun müəmmalı olması ilə bağlı məlumatlar yayılır.

Təsdiqlənməmiş məlumatlara görə, kreyserin ekipajını yayındırmaq üçün “Bayraktar TB2” göndərilib, bundan sonra Odessa bölgəsindən raket hücumu həyata keçirilib.

Ukrayna mediası bildirir ki, bu, İkinci Dünya Müharibəsinin bitdiyi 1945-ci ildən bəri dünyada batan ən böyük hərbi gəmidir. SOS siqnalı saat 1:05-də verilib. Gəmi liman tərəfə yatıb və 54 dənizçi türk gəmisi tərəfindən xilas edilib.

Xatırladaq ki, çərşənbə günü Odessa administrasiyasının rəhbəri Maksim Marçenko “Neptun” qanadlı raketlərinin Rusiya Hərbi Dəniz Qüvvələrinin Qara dəniz donanmasının flaqmanı olan “Moskva” raket kreyserini vurduğunu açıqlayıb.

“Qara dənizi qoruyan “Neptun” raketləri Rusiya gəmisinə çox ciddi ziyan vurub. Ukraynaya eşq olsun!", - Marçenko yazıb.

Ukrayna prezidentinin aparatının rəhbərinin müavini Oleksiy Arestoviçin sözlərinə görə, gəmidə yanğın baş verib. O xatırladıb ki, “Moskva” müharibənin ilk günü, fevralın 24-də Qara dənizdəki Zmeynı adasının alınmasında iştirak edib.

Amerikanın “SkyNews” telekanalı öz mənbələrinə istinadən xəbər verir ki, “Moskva” raket kreyserində yanğın baş verib və bundan sonra Rusiyanın digər gəmiləri köməyə gəlib. Mənbənin məlumatına görə, gəmi Odessanın cənubundakı Zmeiny adasından 25 dəniz mili məsafədə yerləşir.

Gecə yarısından sonra Rusiya Müdafiə Nazirliyi Moskvada yanğın və partlayış baş verdiyini təsdiqləyib. Bildirilib ki, kreyserə ciddi ziyan dəyib, döyüş sursatının partlaması nəticəsində baş verən yanğınla əlaqədar gəminin heyəti təxliyə edilib. ““Moskva” raket kreyserində baş verən yanğın nəticəsində silah-sursat partlayıb. Gəmiyə ciddi ziyan dəyib, ekipaj tamamilə təxliyə edilib”, - TASS Rusiya Müdafiə Nazirliyinin nümayəndəsinə istinadən yazıb.

"Moskva" kreyseri Project 1164 Atlant-ın aparıcı gəmisidir. Sovet dövründə Ukraynada, 1982-ci ildə suya salınan Nikolaev Gəmiqayırma Zavodunda təməli qoyulub və əvvəlcə “Slava” adını daşıyırdı. 1989-cu ildə Sov.İKP MK-nın Baş katibi Mixail Qorbaçovun ABŞ prezidenti Corc Buşla Maltada keçirilən zirvə görüşünün müşayiətində iştirak etmişdir. 2000-ci ildə artıq "Moskva" adı altında üzən gəmi Rusiya Hərbi Dəniz Qüvvələrinin Qara dəniz donanmasının flaqmanı oldu. Kreyser bir sıra silahlı münaqişələrdə, o cümlədən Rusiyanın Suriyadakı əməliyyatında iştirak edib. Bundan sonra gəmi bir neçə il təmir edilib.

Gəminin ekipajı 510 nəfərdir, uzunluğu 190 metrdir, qanadlı raketlər kompleksi, bir neçə zenit-raket kompleksi, artilleriya və gəmi əleyhinə silahlarla təchiz olunub.