Xüsusi elçi Stiv Vitkoff və ABŞ prezidentinin kürəkəni Cared Kuşnerlə birlikdə Moskvaya Ağ Evin Milli Təhlükəsizlik Şurasının (MTŞ), Dövlət Departamentinin və Maliyyə Nazirliyinin nümayəndələri də səfər ediblər.

Məlumatı Axios Ağ Evin sözçüsünə istinadən yayıb. Ağ Ev rəsmisinin sözlərinə görə, Vitkoff və Kuşner Rusiyaya səfərləri zamanı münaqişənin sülh yolu ilə bağlı təklifləri müzakirə etmək üçün adları qeyd olunan qurumların rəsmiləri ilə birlikdə olublar.

Onların arasında ABŞ maliyyə nazirinin sanksiyalar siyasətindən məsul olan müavini Cin Lanq da var idi. Bildirilib ki, Lanq Vitkoff və Kuşnerin Vladimir Putinin xüsusi elçisi və Rusiya Birbaşa İnvestisiya Fondunun (RDIF) baş direktoru Kirill Dmitriyevlə görüşündə iştirak edib, lakin Putinlə görüşlərində iştirak etməyib. Portala görə, ABŞ Maliyyə Nazirliyi nümayəndəsinin Amerika danışıqçılarının səfərində iştirakı "Rusiyaya qarşı ABŞ sanksiyalarının da müzakirə olunduğunu göstərir".

ABŞ administrasiyasının rəsmisi qeyd edib ki, Vaşinqton ABŞ nümayəndə heyətinin bazar günü Kiyevdə "eyni dərəcədə məhsuldar görüşlər keçirəcəyini" gözləyir./musavat.com