REAL Partiyasının İcra katibi, politoloq Natiq Cəfərli “Qafqaz Media” internet telekanalının aparıcısı Kamran Güllərin suallarını cavablandırıb. Muxalifet.az saytı müsahibədən bəzi sitatları və videomüsahibəni dəyərli oxucularına təqdim edir:

- “KTMT qoşunlarının Qazaxıstanda olması əhali tərəfindən xoş qarşılanmadığından, Tokayev yaxın 10 gün ərzində bütün qoşunların ölkədən çıxarılacağı haqda bəyanatlar səsləndirdi”

- “Qazaxıstan rəhbərliyi çox gözəl anlayır ki, Rusiya ölkənin şimal hissəsini Qazaxıstandan qoparacaq gücə malikdir...”

- “Qazaxıstan hadisələrinin əsas səbəblərindən biri klanlararası daxili savaşdır... Təəssüf ki, bu savaş ölkəyə xarici qoşunların gəlməsinə yol açdı, yüzlərlə insanın həlak olmasına səbəb oldu”

- “Rusiya Baykanurun müdafiəsini gücləndirmək adı altında oradakı qoşunlarının sayını dəfələrlə artıra bilər”

- “KTMT formal olaraq Qazaxıstandan çıxsa da, rus qoşunun bir hissəsi Qazaxıstan ərazisində qala bilər”

- “Tokayevin güclənərək iqtisadi məsələlərə müdaxilə etməsi köhnə klanın xoşuna gəlmədi... Son hadisələr də onu göstərdi ki, Tokayevin əsas hədəfi Nazarbayevin kölgəsindən canını qurtarmaqdır”

- “Qazaxıstan hadisələrinin əsas səbəblərindən biri budur ki, Nazarbayev Putinin SSRİ-ni diriltməsinə qarşı çıxıb...”

- “Nazarbayevin həyatda olub-olmadığı ilə bağlı ciddi suallar var...”

- “Rusiya ilkin mərhələdə Qazaxıstanda istədiyini əldə etdi...”

- “Rusiya faktiki olaraq Qazaxıstandakı uran yataqlarına da nəzarəti öz üzərinə götürdü”

- “Mən düşünürəm ki, Qərb-Rusiya qarşıdurmasının pik nöqtəsinə yaxınlaşırıq...”

- “Yaxın aylarda SSRİ-nin başqa bir adla “xortlaması”nın şahidi ola bilərik”

- “Türkiyənin Qazaxıstanda gücü bir yerə qədərdir...”

- “Rusiya bu həmlə ilə Türk Birliyinin yaranmasını ən azı ləngitdi, çünki Qazaxıstan bu zəncərin ən vacib həlqələrindən biri idi”

- “Türk cümhuriyyətlərinin bir çoxunda çatışmayan cəhət elmi-mədəni azadlıqların məhdudlaşdırılmasıdır”

- “Lukaşenko Putinin təzə Jirinovskisidir...”

- “Bu il SSRİ-nin yaranmasının 100 illiyidir. Bu simvolikadan istifadə edib, hansısa formada yeni bir ittifaq müqaviləsinin ya imzalanması, ya da elan olunması mümkündür”

- “Rusiya anlayır ki, Azərbaycanda ictimai rəyi çoxdan itirib...”

- “Rusiya anlayır ki, gec-tez Azərbaycanla Ermənistan anlaşacaq, bundan sonra “sülhməramlılar”ın orda qalması problemə çevriləcək. Ona görə də Xankəndidə yaşayan erməniləri özünə daha çox bağlamaq istəyir”

- “Rusiya Xankəndidəki qondarma qurumu de-yure tanıya və onun əli ilə orda qala bilər”

- “Ermənistan Rusiyadan addım-addım qopmaq istəyir”