Martın 4-də özünün parlament qarşısında illik çıxışında Gürcüstan prezidenti Salome Zurabişvili deyib ki, Moskvanın siyasətləri onun ölkəsini Avropa İttifaqı və NATO-ya gedən yoldan sapındıra bilməyəcək:

“Əgər Rusiya Gürcüstan ərazilərinin işğalından Gürcüstanı öz istəklərindən əl çəkməyə vadar etmək üçün istifadə etməyi planlaşdırırsa, o bu məqsədinə heç vaxt çata bilməyəcək”.

Moskva Gürcüstanla 2008-ci ildə apardığı qısa müharibədən sonra bu ölkənin Abxaziya və Cənubi Osetiya bölgələrinin müstəqilliyini tanıyıb və bu separatçı ərazilərdə qoşun saxlayır. Dünya ölkələrinin əksəriyyəti Abxaziya və Cənubi Osetiyanı Gürcüstanın ərazisi kimi tanıyır.

Öz çıxışında Zurabishvili ölkəsinin son nəticədə Avropa İttifaqı və NATO-ya qoşulacağını bir daha bəyan edib.

O deyib ki, Gürcüstan hətta bu təşkilatlara qoşulmadan belə hazırda həm Avropa İttifaqı, həm də NATO-da fəal oyunçudur.

Zurabişvili bildirib ki, 2019-cu ildə ABŞ Konqresindəki hər iki partiya tərəfindən qəbul edilmiş Gürcüstana Dəstək Qanunu iki ölkə arasındakı sıx bağların və dərin etimadın sübutudur.

Gürcüstanda qarşıdan gələn parlament seçkisi məsələsinə toxunan prezident həm müxalifəti, həm də hakim Gürcü Arzusu partiyasını dialoqu davam etdirməyə çağırıb:

“Ərazisinin 20 faizi işğal olunmuş Gürcüstanın çətin vəziyyətini nəzərə alaraq biz daxili siyasi çəkişmələrimzidə ehtiyatlı olmayıq ki, sabitlik pozulmasın”.

Müxalifət partiyaları bildirirlər ki, Gürcüstanın hazırkı seçki qanunu ədalətsizcəsinə hakim Gürcü Arzusu partiyasına sərfəlidir. Ötən ilin iyun-iyul aylarında Tbilisidə kütləvi və izdihamlı etiraz aksiyaları polis tərəfindən zorakı şəkildə dağıdılıb. /azadliq.org