İsrailin baş naziri Benyamin Netanyahunun müdafiə nazirini istefaya göndərməsindən sonra ölkədə on minlərlə insan küçələrə axışıb.

Müdafiə naziri Yoav Gallant baş nazirin irəli sürdüyü ədliyyə sisteminin əsaslı islahatları ilə bağlı mübahisəli planlara qarşı çıxıb.

Qüdsdə (Yerusəlimdə) polis və əsgərlər cənab Netanyahunun evinin yaxınlığında nümayişçilərə qarşı su şırnaqlarından istifadə ediblər.

Bazar ertəsi səhər tezdən İsrail Prezidenti İsaak Hersoq hökuməti islahatları dayandırmağa çağırıb.

"İsrail xalqının birliyi naminə, məsuliyyət naminə sizi qanunvericilik prosesini dərhal dayandırmağa" çağıran Prezident "Bütün İsrail xalqının gözü sizin üzərinizdədir" deyə əlavə edib.

ABŞ həmçinin hadisələrin inkişafından dərin narahat olduğunu bildirib və güzəştə getməyə çağırıb.

Artıq yeni qanunla bağlı bir həftəlik fasilə nəzərdə tutulub.

İslahatlar hökumətə hakimləri təyin edən komitə üzərində tam nəzarəti təmin edəcək planları ehtiva edir.

Etiraz edən çoxlu insan hesab edir ki, baş nazir Benyamin Netanyahunun islahatları məhkəmələrin vəzifəyə yararsız hesab edilən rəhbərləri işdən çıxarmaqda səlahiyyətlərini azaldacaq və bu hal korrupsiyaya görə davam edən mühakimə ilə üzləşən hazırkı baş nazirin maraqlarına uyğundur.

Cənab Netanyahu deyir ki, islahatlar məhkəmələrin öz səlahiyyətlərini həddən artıq aşmasını dayandırmaq üçün nəzərdə tutulub və son seçkilərdə ictimaiyyət tərəfindən onlara səs verilib.

Cənab Netanyahunun evinin qarşısında etiraz etdikdən sonra nümayişçilər - çoxlu İsrail bayraqları və qab-qacaqları döyəcləyiblər - daha sonra İsrail parlamenti Knessetə gəlmək üçün polis qüvvələrindən yayınıblar.

Bir hökumət işçisi BBC-yə deyib ki, o, cənab Netanyahunun "demokratik ölkə olaraq sahib olduğumuz bütün sərhədləri keçdiyini" hiss edir.

"Bizdə olan demokratiyanın son hissəsini müdafiə edirik və mən bu şəkildə yata bilmirəm. Bu dəliliyi dayandırana qədər heç nə edə bilmərəm" deyib.

Tel-Aviv-də bayraq qaldıran etirazçılar iki saatdan çox əsas magistral yollardan birini bağlayıb, sonra onlar atlı polis və su şırnaqları ilə uzaqlaşdırılıb.

Cənab Gallant keçmiş hərbçidir və həftələrdir ki, qanun dəyişikliyindən narazı olan ehtiyatda olan hərbçilərdən eşitmişdir.

Martın əvvəlində İsrail Hərbi Hava Qüvvələrinin elit eskadrilyasında olan qırıcı pilotlar hökumətə qarşı görünməmiş etiraz aksiyası keçirərək təlimlərə qatılmayacaqlarına söz veriblər.

Daha sonra onlar iştirak etməyə və komandirləri ilə danışıqlar aparmağa razılaşdılar.

Cənab Gallant şənbə günü qanuna qarşı çıxış edərək, İsrail Müdafiə Qüvvələrinin üzvlərinin qəzəbli və məyus olduğunu söylədi.

Cənab Netanyahu - cənab Gallantın televiziyada çıxışı zamanı ölkədən kənarda olan - müdafiə naziri olaraq ona artıq inanmadığını söylədi.

Baş nazir yeni qanun layihəsini həftənin sonuna qədər parlamentdən keçirmək istəyir.

İki siyasətçi eyni Likud partiyasının üzvləridir və müdafiə naziri bəzi həmkarlarının dəstəyini qazansa da, ifrat sağçılar onu getməyə çağırıb.

İşdən çıxarılmasını cənab Gallant Twitter-də bir daha təsdiqləyib: "İsrailin təhlükəsizlik vəziyyəti həmişə mənim həyat missiyam olub və olacaq".

İsrailin müxalifət lideri Yair Lapid cənab Gallantın işdən çıxarılmasını hökumət üçün "yeni bir eniş” adlandırıb.

"Netanyahu Gallantı işdən çıxara bilər, lakin o, reallığı və ya koalisiyanın çılğınlığına müqavimət göstərən İsrail xalqını işdən çıxara bilməz" cənab Lapid deyib.

Ağ Evin sözçüsü vəziyyətlə bağlı ABŞ-ın narahatlığını dilə gətirib: "Prezidentin bu yaxınlarda Baş nazir Netanyahu ilə müzakirə etdiyi kimi, demokratik dəyərlər həmişə ABŞ-İsrail münasibətlərinin əsas predmeti olub və belə də qalmalıdır".

O, əlavə edib ki, demokratik sistemə "fundamental dəyişikliklər" "mümkün olan ən geniş xalq dəstəyi ilə həyata keçirilməlidir".

“Biz İsrail liderlərini mümkün qədər tez bir şəkildə kompromis tapmağa çağırmağa davam edirik”./bbc