Gürcüstanda Cənubi Qafqaz ölkələri, eləcə də İran, ABŞ, Polşa və Seneqaldan olan musiqiçilərin iştirakı ilə “One Caucasus-2018” V beynəlxalq musiqi festivalı keçirilib.
Muxalifet.az xəbər verir ki, festival azərbaycanlıların yığcam yaşadıqları Bolnisi rayonunun Poladauri kəndi ərazisində təşkil edilib.
Keçən il isə festival Marneuli rayonunun Tserakvi kəndində keçirilmişdi.
Festivalın təşkilat komitəsinin sədri Vitek Hebanovski bildirib ki, tədbirin əsas məqsədi Cənubi Qafqazda yaşayan gəncləri ruhlandırmaq, dinc, sabit və təhlükəsiz bölgə yaratmaqdır. “Musiqi ilə sülh vəhdət təşkil edir. Bu yolla biz Cənubi Qafqazda sülhə nail ola bilərik”, - deyə o vurğulayıb.
Azərbaycanı bu festivalda “DiHaj” elektron musiqi qrupunun və “H3Collectiv” qrupunun müşayiəti ilə “Avroviziya-2017” mahnı müsabiqəsinin iştirakçısı Diana Hacıyeva təmsil edib. Təmsilçimizin çıxışı maraqla və alqışlarla qarşılanıb.
Festival çərçivəsində xalq yaradıcılığı sənəti nümunələrinin yarmarkası, mövzu üzrə seminarlar təşkil olunub.