Türkiyənin məşhur müğənnisi Sibel Can Bakı Konqres Mərkəzində konsert proqramı ilə çıxış edir.

Musavat.com xəbər verir ki, "Liatris holding"in rəhbəri, iş qadını Ruhi Əliyevanın təşəbbüsü və təşkilatçılığı ilə baş tutan gecəyə ifaçı "Səndən başqa kimsem yok" mahnısı ilə start verib. Daha sonra qonaqları salamlayan ifaçı Bakıda olmaqdan məmnun olduğunu deyib:

"Ruhi xanıma təşəkkür edirəm ki, bizə belə gözəl gecə yaşamağa şərait yaratdı. Oğlum Engincan ilə Bakının tarixi yerlərini gəzdik, milli yeməklərinizdən daddıq. Azərbaycan mənə doğmadır. Mən sizdən biriyəm, sizin qızınızam".

Sibel Can ard-arda sevilən yeni və köhnə mahnılarını səsləndirib. Repertuarına Azərbaycan mahnısı da əlavə edən türkiyəli ulduz "Sən gəlməz oldun" mahnısını da ifa edib.

Tamaşaçıların arasına düşən müğənniyə fanat ordusu "hücum" edib. O mühafizəçilərin köməkliyi ilə səhnəyə qalxıb.

Tamaşaçıların alqışları ilə konsert başa çatıb.