Rusiyanın Vaşinqtondakı səfirliyinin binası qarşısındakı meydana mərhum siyasətçi Boris Nemtsovun adı verilib. Qərarı Vaşinqton Şəhər Şurası çıxarıb. Novator.az bildirir ki, fevralın 27-si Rusiya səfirliyinin binası qarşısında keçirilən açılış mərasiminə ABŞ Dövlət Departamentinin rəsmiləri, konqresmenlər, rus diasporunun nümayəndələri qatılıb.
Rusiya müxalifətinin liderlərindən olan Boris Nemtsov 2015-ci il fevralın 28-nə keçən gecə Moskvada odlu silahla qətlə yetirilib.
Ötən il iyulun 13-də Moskva Dairə Hərbi Məhkəməsi qətldə təqsirli bilinən Zaur Dadayevə 20 il həbs cəzası kəsib. İstintaqın versiyasına görə, 2014-cü ilin sentyabr ayında Ruslan Muxudinov Beslan Şavanova, Zaur Dadayevə, Şədid və Anzor Qubaşevlərə, Temirlan Əsgərxanova və Həmzət Baxayevə Boris Nemtsovu öldürməyin müqabilində 15 milyon rubl təklif edib.
2015-ci il fevralın 27-si axşam Zaur Dadayev Boris Nemtsovu güllələyib.
Zaur Dadayev, Şədid və Anzor Qubaşevlər, Temirlan Əsgərxanov və Həmzət Baxayev aparılan xüsusi əməliyyatlar nəticəsində saxlanıb, Beslan Şavanov Qroznı şəhərində ələ keçməmək üçün özünü qumbara ilə partladıb. Qətlin sifarişçisi və təşkilatçısı hesab olunan Ruslan Muxudinov isə beynəlxalq axtarışdadır.
Məhkəmə Anzor Qubaşevə 19 il, Şədid Qubaşevə 16 il, Temirlan Əsgərxanova 14 il, Həmzət Baxayevə 11 il iş verib.