ABŞ prezidenti Donald Tramp Dallas şəhərində Milli Atıcılıq Assosiasiyasının illik konfrasındakı çıxışı ilə növbəti dəfə qalmaqal yaradıb. Virtualaz.org xəbər verir ki, Tramp amerikalılara silah məhdudiyyətinin tətbiq edilməsinə qarşı çıxaraq nüfuzlu silah lobbisinə öz dəstəyini ifadə edib. “Nə qədər ki mən prezidentəm-sizin Konstitusiyaya ikinci düzəlişə əsaslanan haqqınız heç vaxt atəş altında qalmayacaq”-o bildirib.

Daha sonra Tramp amerikalıların silah daşımasına haqq qazandırmaq üçün Parisdə 2015-ci ildə İŞİD terrorçuları tərəfindən törədilmiş və 130-dan çox adamın ölümünə səbəb olmuş terror hücumunu misal göstərib. Deyib ki, əgər həmin vaxt insanlarda silah olsaydı onlar terrorçuların qarşısını ala bilərdilər. Lakin heç kimdə silah olmadığından azsaylı terrorçular insanları rahatca güllələyiblər və gediblər. Bunun ardınca Tramp terrorçuların insanları necə güllələdiyini əyani şəkildə təsvir edib, barmaqlarını tapança kimi tutaraq bildirib: “Bumm! Növbəti! Bumm! Növbəti!...”

Trampın bu çıxışı Fransada hiddət doğurub. Fransa XİN bəyanat yayaraq ABŞ prezidentini terror hücumunda həlak olan Paris sakinlərinin ruhuna hörmətsizlikdə qınayıb. Bəynatda deyilir ki, Fransa atıcı silahlarla bağlı sərt qadağaların hökm sürdüyü ölkə olması ilə fəxr edir.