Moskvanın Avropa və Şimali Amerika ölkələrinə hücum etməyə cəsarəti çatmaz.
Axar.az xəbər verir ki, bu barədə NATO-nun keçmiş baş katibi Anders Foq Rasmussen deyib.
Rasmussenin sözlərinə görə, alyans ölkələrindən istənilən birinə hücum edəcəyi təqdirdə Rusiya qırmızı xətti keçəcək. Bu isə NATO ölkələrini istəməsələr belə cavab tədbirləri görməyə vadar edəcək.
“Qərb-2017” təlimlərinə Rusiyanın elan etdiyindən çox daha artıq hərbi kontingent cəlb olunub. Bizim ən böyük narahatçılığımız təlimlər başa çatdıqdan sonra Rusiyanın bölgədə nə qədər hərbi texnika və əsgərini Belarusda saxlamasıdır. Bu, həm Belarusa, həm də NATO və Finlandiya ilə sərhədlərə aiddir”, - Rasmussen deyib.
Rasmussen həmçinin NATO-nun Baltikyanı ölkələrə və Polşaya artıq qoşun yerləşdirdiyini bildirib:
“Bu o deməkdir ki, əgər Rusiya hücum edərsə, təkcə Estoniya, Latviya, Litva ordusu ilə deyil, eyni zamanda Almaniya, İngiltərə və ABŞ ordusu ilə üz-üzə gəlməyə məcbur olacaq. Başqa sözlə çoxmillətli ordu ilə üzləşəcək. Əlbəttə ki, Rusiya bütün bu Avropa və Şimali Amerika ölkələrinə hücum etməyə cəsarət edə bilməz”.
Eks baş katib eyni zamanda Rusiyanın “Qərb-2017” təlimləri vasitəsi ilə Avropa ölkələrinə mesaj verdiyini, neft qiymətlərinin aşağı düşməsinə baxmayaraq hələ də qüdrətli və güclü bir ölkə olduğunu göstərmək istədiyini söyləyib