Son illər Gürcüstan hakimiyyətinin erməni məsələsi ilə bağlı yürütdüyü siyasətə nəzər saldıqda, müəyyən ziddiyyətlər ortaya çıxır.
Muxalifət.az xəbər verir ki, bunu axar.az-a politoloq İlqar Vəlizadə deyib.
Ekspert bildirib ki, Mixail Saakaşvilinin vaxtında Gürcüstanda, özəlliklə də Cavaxetiyada fəaliyyət göstərən ekstremist və separatçı qruplara qarşı sərt addımlar atılsa da, indi o bölgədə başqa mənzərə gözə çarpır:
 “Son illər Gürcüstan hakimiyyətinin xüsusilə də erməni məsələsi ilə bağlı yürütdüyü siyasətə nəzər saldıqda, müəyyən ziddiyyətlər ortaya çıxır. Ekstremist elementlər Cavaxetiyada yenidən peyda olmağa başlayıblar və Gürcüstanda müxtəlif aksiyalar keçirməyə cəhd göstərirlər. Son zamanlar həmin qüvvələrin bir hissəsi Ermənistan kilsəsinin himayəsi altında fəaliyyət göstərir. Hətta erməni keşişlər də bu fəaliyyətlərdə iştirak edirlər. Belə tendensiyalar fonunda Gürcüstanda ASALA-ya yaxın olan terror qruplarının fəaliyyət göstərdiyi istisna edilmir. Çünki son illərin hadisələri də göstərir ki, Gürcüstanda ekstremist qüvvələr çox fəallaşıblar və xüsusilə də müsəlmanlara qarşı təxribatlar keçirməyə çalışırlar”.
Poliotoloq bu fonda Gürcüstanın bir sıra regionlarında yenidən təxribatların baş verə biləcəyini istsina etməyib:
 “Hesab edirəm ki, Gürcüstan hökuməti bu məsələyə ciddi diqqət göstərməli və terrorçulara qarşı hərəkətə keçməlidir. Həmin qruplar birbaşa fəaliyyət göstərməsələr də, gürcü milllətçiləri ilə birləşib onların əli ilə ölkədə hansısa xoşagəlməz hadisələr törədə bilərlər. Təcrübə göstərir ki, Gürcüstanın müxtəlif bölgələrində bu kimi hallar yenidən təkrarlana bilər”.
Qeyd edək ki, ASİMDER-in rəhbəri Göksəl Gülbəy ASALA-nın Gürcüstanın Cavaxetiya bölgəsində Virk-Yerkir adıyla yenidən qurulduğunu bildirib.
 “Ruslar Axalkalakidəki rus bazasını boşaldıb bölgədən çıxanda götürə bilmədikləri müəyyən silahları Cavaxetiyadakı Virk-Yerkirin üzvlərinə verdilər. Cavaxetiyaya yaxın bölgələrdə olan türklər təhdid altındadırlar. Rusların verdikləri silah və maddi dəstəklə Xocalı qətliamını həyata keçirən ermənilər Gürcüstanda da Borçalı qətliamını gerçəkləşdirəcəklər. ASALA-ya bənzəyən Virk-Yerkir bunu həyata keçirmədən öncə Gürcüstan dövlət rəsmiləri, Türkiyə və Azərbaycanın xarici işlər nazirlikləri buna müdaxilə etməlidirlər”, - o qeyd edib.