Türkiyənin Rusiyadan S-400 havadan müdafiə sistemlərini almaqdan imtina etdirməyə çalışan ABŞ rəhbərliyinin Ankaraya sürpriz bir təklif təqdim etdiyi ortaya çıxıb.
Muxalifət.az xəbər verir ki, ABŞ rəhbərliyi “Patriot” hava hücumundan müdafiə sistemi ilə bağlı ortaq istehsal və ortaq inkişaf üsullarını özündə ehtiva edən bir “niyyət memorandum”unu Ankaraya təqdim edib.
ABŞ Dövlət Departamentinin hərbi və siyasi əlaqələrdən məsul olan nümayəndəsi Tina Kaydanov “Patriot” sistemlərinin Türkiyəyə satışına dair yeni qiymət də təklif edib.
Qeyd edək ki, bir müddət əvvəl ABŞ Dövlət Departamentinin hərbi və siyasi əlaqələrdən məsul olan nümayəndəsi Tina Kaydanov Türkiyədə səfərdə idi. Səfər çərçivəsində Kaydanov Ankarada Xarici İşlər Nazirliyi, Müdafiə Nazirliyi və Müdafiə Sənayesi Müşavirliyində görüşlər keçirmişdi. Kaydanovun Ankaraya “Patriot” sistemlərinin satılması təklifini gətirdiyi açıqlanmışdı.