“Ermənistan-Azərbaycan sərhədində gərginlik görünməmiş səviyyədə aşağı enib”.
Muxalifet.az publika.az-a istinaden xəbər verir ki, bu barədə Ermənistanda baş nazir vəzifəsini icra edən Nikol Paşinyan deyib.
Onun sözlərinə görə, təmas xəttində toqquşmalardan ölənlərin sayı da son illərlə müqayisədə çox aşağıdır.
Paşinyan bu çıxışı “Mənim addımım” seçki blokunun təbliğat kampaniyası çərçivəsində keçirilən görüşdə səsləndirib və əslində, bununla seçicilərə “mənim fəaliyyətim nəticəsində sizin övladlarınız cəbhədə güllədən ölmür” mesajını vermək, beləliklə, səsləri almaq niyyətindədir.
Bu seçkiqabağı təbliğat fonunda təbii görünür, lakin Paşinyan onu da anlayır ki, təmas xəttində sakitlik Düşənbə görüşündə Azərbaycan tərəfinin sərgilədiyi konstruktiv mövqeyə borcludur. Azərbaycan Ermənistanda seçki prosesinin başa çatmasını gözləyir və ondan sonra münaqişənin həlli ilə bağlı danışıqlar aktivləşməli, İrəvan konstruktiv mövqe ilə masaya qayıtmalıdır. Bakı bununla Ermənistana vaxt verir, sülh danışıqları konkret nəticəyə hesablanan danışıqlar olmasa, Azərbaycan Ordusu işğal altındakı ərazilərin azad edilməsi üçün lazımı addımlar atacaq.