Göyçay rayon sakinləri - İsmayılova Kəmalə Ağasəf qızı, Rəhimli Elnur Nazim oğlu, Məmmədov Cavid İkram oğlu, Məmmədova Südabə Nəzimi qızı, Səmədov Məhəmmədəli Azər oğlu tərəfindən Muxalifet.az saytının redaksiyasına şikayət məktubu daxil olub. Saytımız vasitəsilə Prezident İlham Əliyevə, Mədəniyyət naziri Adil Kərimliyə müraciət edən şikayətçinin məktubunu olduğu kimi dərc edirik:
"Cənab Prezident!
Yazaraq bildirmək istəyirik ki, Göyçay Rayon İcra Hakimiyyəti tərəfindən haqsızlığa məruz qalan, problemləri həll edilməyən biz vətəndaşların etdiyi haqlı müraciətlər Mədəniyyət Nazirliyi Göyçay Bayraq Muzeyinin direktoru, "jurnalist" Fatimə Mövsüm tərəfindən yalanlanmağa çalışılır. Həmin qadının sosial şəbəkə hesablarında haqqımızda şər və böhtan paylaşımlar edilir. Hətta o, şəxsi həyatlarımıza belə müdaxilə etməkdən çəkinmir.
Mən, Göyçay rayonu Ulaşlı-Şıxlı kənd sakini İsmayılova Kəmalə Ağasəf qızı, bildirirəm ki, Göyçay Rayon İcra Hakimiyyəti haqq və hüquqlarımı pozmaqda idi. Məhz ona görə də videomüraciət edərək ölkə başçısından və aidiyyəti orqanlardan kömək istədim. Bundan sonra özünü "jurnalist" adlandıran  Fatimə Mövsüm adlı şəxs dərhal Göyçay Rayon İcra Hakimiyyəti başçısı Natiq Ağayevin müdafiəsinə keçdi. Mənim haqqımda həqiqətə uyğun olmayan video hazırlayaraq, haqq və hüquqlarımı ayaqlar altına aldı.
Mən, Rəhimli Elnur Nazim oğlu, bildirmək istəyirəm ki, şəhid qardaşıyam. Göyçay Rayon İcra Hakimiyyəti başçısının birinci müavini İkram Vəliyev mənə şəhərin Heydər Əliyev prospektində köşk istifadə etməyim üçün yer vermişdi. Lakin bir müddət sonra Natiq Ağayev Göyçaya İcra başçısı təyin olundu. O, məndən köşkün yığışdırılmasını tələb etdi. Mən də özümü videoya çəkərək şikayətimi ictimailəşdirdim. Bunun ardınca Fatimə Mövsüm adlı "mədəniyyət işçisi" və ya "jurnalist" mənim yalançı olduğum haqda video material hazırladı. Özünü İcra başçısı Natiq Ağayevin vəkili qismində ortaya atan F.Mövsümə məxsus "Facebook" hesabındakı paylaşımların altından mənim barəmdə təhqir və nüfuzu ləkələyən şərhlər yazılmağa başladı.
Mən, Göyçay rayon sakini Məmmədov Cavid İkram oğlu, 10 ildir onkoloji xəstəyəm, övladım isə anadangəlmə serebral iflic xəstəsidir. Corab sata-sata pul yığıb Göyçay Çayının ətrafından 4000 (dörd min) manata torpaq almışdım. Tikintiyə başlayar-başlamaz Göyçay Rayon İcra Hakimiyyəti sözün həqiqi mənasında xirtdəyimə çökdü. Haqq səsimin yuxarı instansiyalara yetişməsi üçün yazılı və videomüraciətlər etdim. Göyçay Baraq Muzeyinin direktoru Fatimə Mövsüm özünə məxsus sosial şəbəkə hesablarında məni yalançı, dırnağarası yazarların əlaltısı adlandırdı. Haqqımda yalan və iftira dolu paylaşımlar etdi.
Mən, Məmmədova Südabə Nəzimi qızı, yuxarıda adı keçən Məmmədov Cavid İkram oğlunun həyat yoldaşıyam. Həyat yoldaşımın paylaşdığı yazıların linklərini özümün açdığım “Facebook” sosial şəbəkə hesabımda paylaşmışdım. Mədəniyyət Nazirliyinin nəzdində olan Göyçay Bayraq Muzeyinin direktoru Fatimə Mövsüm adlı qadın öz vəzifəsini kənara qoyub, Natiq Ağayevin müdafiəsinə keçərək mən və həyat yoldaşım haqqında insanı gözdən salan, şərəf və ləyaqəti alçaldan, həqiqətə uyğun olmayan video səsləndirdi. Guya bizlər dırnaqarası yazarların əlaltılarıyıq. Onun sosial şəbəkə hesablarının altında saxta profillərlə şəxsi həyatımızdan bəhs edən nalayiq şərhlər yazıldı.
Mən, Göyçay rayon sakini Səmədov Məhəmmədəli Azər oğlu, 1-ci qrup hərbi əlil və eyni zamanda ictimai fəalam. Yuxarıda müraciət edən şəxslər məndən öz şikayətlərini ictimailəşdirməyimi xahiş etmişdilər və mən də öz növbəmdə təmənnasız onlara kömək etdim. Göyçay Rayon İcra Hakimiyyəti başçısı Natiq Ağayev haqqında ölkə rəhbərliyinə və aidiyyəti orqanlara ünvanlanan müraciətlərdən sonra icra başçısının göstərişi ilə Göyçay Bayraq Muzeyinin direktoru Fatimə Mövsüm adlı "jurnalist" mənim şərəf və ləyaqətimi alçaldan, şər və böhtan xarakterli video paylaşdı. Videoya əsasən, məni dırnaqarası yazar adlandırdı. Eyni zamanda səsləndirdiyi videoda mənim "Məhəmmədəli Səmədov" “Facebook” sosial şəbəkə hesabımı göstərərək, məni "reket yazar" adlandırmağa başladı. Bundan əlavə, guya şikayətçi vətəndaşları mən başdan çıxarır və Göyçay Rayon İcra Hakimiyyəti başçısı Natiq Ağayev haqqında qərəzli paylaşımlar edirəm. Bu, açıq-aşkar yalan və mənim susdurulmağım üçün Göyçay Rayon İcra Hakimiyyətinin qurduğu "möhtəşəm" bir oyundur.
Cənab Prezident!
"Dövlət qulluqçularının etik davranış qaydaları haqqında" Azərbaycan Respublikasının Qanununun aşağıdakı maddələrinə əsasən, 8.1. Dövlət qulluqçularının fəaliyyəti insanların hüquq, azadlıq və qanuni maraqlarının təmin olunmasına (qorunmasına və müdafiəsinə) xidmət etməlidir.
8.2. Dövlət qulluqçusu insanların hüquq və azadlıqlarını, qanuni maraqlarını pozan, onların şərəf, ləyaqət və işgüzar nüfuzunu ləkələyə biləcək qərarlara və hərəkətlərə (və ya hərəkətsizliyə) yol verməməlidir.
Hər çətinliyin çıxış yolunu Allahın iznilə Sizə müraciət etməkdə görən Göyçay sakinləri olaraq çox xahiş edirik ki, Göyçay Bayraq Muzeyinin direktoru Fatimə Mövsümün öz səlahiyyətlərinə aid olmayan məsələlərə qanunsuz müdaxilə etdiyinə görə, onun vəzifən xaric edilməsi və cəzalandırılması üçün Mədəniyyət Nazirliyinə tapşırıq verəsiniz. Ümid edirik ki, Fatimə Mövsümün paylaşımları ilə bizi gözdən salan və ləkələyən Göyçay Rayon İcra Hakimiyyəti haqqında da ciddi tədbirlər həyata keçirəcəksiniz.
Sizə təşəkkürlərimizi bildiririk".
Muxalifet.az
Redaksiyadan: Yazıda adları qeyd olunan qurumların və şəxslərin mövqeyini dərc etməyə hazırıq.