​Xərçəngdən əməliyyat olunub, iki ay kimyəvi müalicə alıb, NAZİRLİK ƏLİLLİK DƏRƏCƏSİ VERMƏKDƏN İMTİNA EDİR – Şikayət

Baxış sayı:
223

Zərdab rayonu Çallı kənd sakini Vahidov Asim Mahmud oğlu tərəfindən Muxalifet.az-ın redaksiyasına şikayət məktubu daxil olub. Saytımız vasitəsilə Əmək və Əhalinin Sosial Müdafiəsi naziri Sahil Babayevə müraciət edən A.Vahidov Zərdab rayon mərkəzi xəstəxanasının rəhbərliyindən şikayətçidir:
“Cənab nazir!
Mən sizə ay yarım bundan əvvəl bu problemimlə bağlı poçt vasitəsi ilə rəsmi qaydada müraciət etmişəm. Bu günə kimi mənim müraciətimə cavab verilməyib. Ola bilər ki, mənim müraciətim sizə çatmayıb. Ona görə də qərara aldım ki, təkrar müraciətimi mətbuat vasitəsi ilə edim.
Xərçəng xəstəliyi ilə bağlı qrup almaq üçün Zərdab rayon Mərkəzi xəstəxanasına müraciət etdim. Müraciətim Azəbaycan Respublikasının Nazirlər Kabinetinin 11 noyabr 2016-cı il tarixli 446 nömrəli qərarı ilə dəyişilərək təsdiq olunmuş “Tibbi-sosial ekspert komissiyaları haqqında Əsasnamə”yə uyğun  rəsmi qeydiyyatdan keçərək baxılması üçün Əmək və Əhalinin Sosial Müdafiəsi Nazirliyinin tərkibində olan elektron sistemə TSERAS-a ötürüldü. Bu müraciətimə 30.05.2018-ci il tarixdə Tibbi Sosial Ekspert Komissiyası tərəfindən imtina verilib. Yəni əlillik təyin olunmayıb. İmtinada göstərilib ki, “Diaqnoz Göndərişin natamam doldurulması. Şişin növü, klinik mərhələsi, histoloji və bioksiya müayinənin nəticəsi yazılmayıb”.
Bu imtina tam əsassızdır. Belə ki, məndə sidik kisəsinin ön divarında bəd xassəli sıfır dərəcəsində xəstəlik qeyd olunub. Bütün bunlar və xəstəxanalarda müalicə almağımla bağlı Səhiyyə Nazirliyi Milli Onkologiya Mərkəzindən mənə verilmiş epiqrez və müayinə sənədlərində qeyd olunub.
Qeyd edim ki, bu xəstəliklə sidik kisəsindən əməliyyat olunmuşam və təxminən iki ay kimyəvi müalicə almışam. Hal-hazırdada hər üç aydan bir analiz və aparat müayinələrindən keçirəm.
Sizdən xahiş edirəm, mənim müraciətimin Tibbi Sosial Ekspert Komissiyası tərəfindən araşdırılaraq, qanuni cavab verilməsinə köməklik göstərəsiniz”.


Muxalifet.az
Redaksiyadan: Mövzunu diqqətdə saxlayacağıq.