"Burada çox sayda jurnalist görməyimdən millinin sizin üçün nə dərəcədə əhəmiyyətli olduğunu başa düşürəm. Yetərincə motivasiyam var. Gələcəkdə sizinlə daha sıx əməkdaşlıq edəcəyimizə ümid bəsləyirəm".
Bunu futbol üzrə Azərbaycan milli komandasının baş məşqçisi təyin olunan Nikola Yurçeviç Bakı Olimpiya Stadionunda keçirdiyi mətbuat konfransında deyib. 
Daha sonra xorvatiyalı mütəxəssis jurnalistlərin suallarını cavablandırıb.
- Müqaviləniz neçə illikdir? 
- Birillik müqavilə olacaq. Lakin sözləşmənin növbəti tsikl üçün daha 2 il uzadılmasına dair bənd var.
- Azərbaycan millisi ilə hansı maksimuma ümid edirsiniz? 
- İlk növbədə, komandamıza inanmalıyıq. Qrupumuzun favoriti Xorvatiya yığması FIFA reytinqində 4-cü yerdədir. Bizim göstərici isə elə də yaxşı deyil. Lakin yaxşı nəticə qazanmaq üçün çalışmalıyıq.
- Çempionat matçları barədə təəssüratlarınız necədir? 
- Burada "Sumqayıt" - "Qarabağ" və "Neftçi" - "Keşlə" oyunlarına baxdım. Xorvatiyada olanda isə "Qarabağ" - "Neftçi" görüşünü izləmişdim. Həmin görüş çox xoşuma gəlmişdi. Yığmanın əksər futbolçuları bu komandalarda oynayır.
- Milliyə hansı yenilikləri gətirə bilərsiniz?
- Bundan əvvəlki seçmə mərhələnin oyunlarını izləmişdim. Düzgün taktika və köklənmə ilə müsbət nəticə qazanmaq olar. Yığmaya çağrılan oyunçuların matça 90 dəqiqə köklənmələri lazımdır. Bu, müasir futbolda çox vacibdir.
- Hansı qapıçıya üstünlük verəcəksiniz? 
- Hələlik baxacağıq. İndidən qəti bir söz demək olmur.
- Seçmə mərhələnin startına çox az vaxt qalıb. Xorvatiya ilə oyunadək hansı işləri görəcəksiniz?
- Bəli, martın 21-də Xorvatiya ilə səfərdə qarşılaşacağıq. Nəzərimdə 20 futbolçu var, hansı ki oyunlarını izləmişəm. Amma yeni futbolçulara da baxacağıq. Yerli çempionatda çıxış edənlərlə bağlı məlumatım olsa da, xaricdə çıxış edənlər barədə yoxdur.
- Köməkçiləriniz kimlər olacaq? 
- Bir yerli, bir xorvatiyalı köməkçim olacaq. Qapıçılar üzrə məşqçi də yerli olacaq. Daha iki xorvatiyalı isə yalnız təlim-məşq toplanışlarında və oyunlarda bizimlə olacaqlar. Xorvatiyalı əsas köməkçim Mario Tokiçdir. Yerli namizədlərlə bağlı federsiyadan təkliflər olacaq, onları dəyərləndirib, qərar verəcəyik.
- Millinin əvvəlki baş məşqçisi sabiq komanda yoldaşınız Robert Prosineçki olub. Təklif alan zamanı onunla məsləhətləşdinizmi? 
- Prosineçki ilə 30 ildən çoxdur tanışam. Həm ondan, həm köməkçisi Qordan Tsipriçlə danışmışam. Prosineçkidən ancaq pozitiv sözlər eşitmişəm. Hər şey göz qabağındadır.
- Azərbaycan millisinin üzvləri bir həftədə iki oyun keçirməkdə çətinlik çəkirlər. Bu problemi necə həll etməyi düşünürsünüz? 
- Bəli, bu barədə məlumatlıyam. Problemi aradan qaldırmağa çalışacağam. Bunu futbolçularla tanış olandan sonra daha dəqiq deyə bilərəm.
- Qarşınıza hansı məqsəd qoyulub? 
- Əsas məqsəd oyundan-oyuna inkişaf etmək və AVRO-2020-yə vəsiqə qazanmaqdır. Avropa çempionatına çıxmaq üçün vuruşacağıq. Bilirəm, çətindir. Amma əlimizdən gələni edəcəyik. 
- Prosineçkinin quzu kababından xoşu gəlirdi. Bəs, siz buranın mətbəxini dadmısınız? 
- Prosineçki ilə söhbətimiz yalnız futboldan olmayıb. Hər şeydən danışıb və müsbət sözlər deyib. Ən çox da yeməkləri vurğulayıb (gülür). Türkiyədə də çalışmışam. Bilirəm ki, sizin xalqlarınız, mətbəxiniz çox yaxındır. Amma Xorvatiya mətbəxi də gözəldir.
- Təlim-məşq toplanışı Bakıda, yoxsa xaricdə olacaq? 
- Toplanış Bakıda olacaq. Premyer Liqanın təqviminə baxıb, qərar verəcəyəm.
- Sizdən əvvəlki baş məşqçi Qurban Qurbanovla görüşmüsünüz? 
- Qurbanovun Azərbaycan futbolunda böyük adının olduğunu bilirəm. Onun Serbiyaya vurduğu qollar da yadımdadır. Hələlik görüşmək imkanım olmayıb. Növbəti 2-3 həftədə bütün Premyer Liqa məşqçiləri ilə görüşüb, onlardan da məlumat almaq istərdim.
- Müqavilənizin maliyyə şərtlərini açıqlaya bilərsiniz? 
- Bu məsələ ilə bağlı federasiya rəsmiləri ilə 2-3 dəqiqə söhbətim olub. Maliyyə şərtlərini müqavilə bağlanılandan sonra AFFA rəsmilərindən soruşa bilərsiniz.
- Prosinçeki adətən oyunlardan bir gün qabaq start heyətini açıqlayırdı. Siz də belə edəcəksiniz? 
- Heyətin öncədən açıqlanmasında problem görmürəm. Amma hərdən elə ola bilər ki, bir gün də səbr etmək lazım gələr.
- Prosinçeki ailəsini də Bakıya gətirmişdi. Sizin də belə bir fikriniz var? 
- Prosineçki haqda yalnız pozitiv sözlər eşitmək xoşdur. Həyat yoldaşımla burada yaşayacağıq. Qızlarım Zaqrebdə təhsil aldıqları üçün arada Bakıya gələcəklər.
- Futbol fəlsəfənizdən bəhs edərdiniz...
- Hücumameyilli futbolu bəyənirəm və belə oyuna üstünlük verirəm. Fəlsəfəm 90 dəqiqə köklənmə və düzgün taktiki hazırlıqdır. Lakin səfərdə Xorvatiya, evdə isə Macarıstana qarşı taktiki planımız fərqli olacaq.
Qeyd edək ki, Nikola Yurçeviç baş məşqçi fəaliyyətinə 2002-ci ildə ölkəsinin "Dinamo" (Zaqreb) komandasında başlayıb. O, 2005-ci ildə isə Avstriyanın "Austriya” və Xorvatiyanın "Slaven Belupo” kollektivlərinə rəhbərlik edib. Bundan sonra S.Biliçin məşqçi korpusunda yer alan mütəxəssis Xorvatiya millisində (2006 - 2012), eləcə də Rusiyanın "Lokomotiv”, Türkiyənin "Beşiktaş” və İngiltərənin "Vest Hem” komandalarında köməkçi-məşqçi funksiyasını yerinə yetirib. N.Yurçeviç son olaraq 2018-ci ildə Zaqreb "Dinamo"sunun baş məşqçisi olub. (Report)