Əgər Rusiya Qərb ölkələrinə hücum etsə NATO ona qarşı nüvə silahlı istifadə etməli olacaq.

Virtualaz.org xəbər verir ki, bu barədə Polşa ordusunun generalı Valdemar Skşipçak bildirib.

General polyak KİV-lərindən birinə müsahibəsində deyib ki, Polşa cəbhəyanı dövlətdir və Rusiya təhdidləri qarşısında NATO-nun birinci hüdudları arasındadır. Onun sözlərinə görə, müharibə olsa Polşa təkbaşına Rusiyanı dayandıra bilməz. Skşipçak deyib ki, NATO-nun son vaxtlar Baltik regionunda və Polşada yerləşdirdiyi əlavə qüvvələr də rusları dayandırmaq üçün kifayət deyil. Müttəfiqlərə isə köməyə yetişmək üçün bir neçə həftə lazım olacaq, o vaxta qədər isə ruslar Polşanı tutardı.

General alyansın qüvvələrini zəifləmiş və qeyri-effektiv adlandırıb. Misal kimi Krımın ilhaqını göstərib. “Qərarlar həddən artıq gec qəbul olunur...NATO yuxudan oyanana qədər Krım və Ukraynanın şərqi artıq Putinin əlində idi”-polyak general haqlı olaraq bildirib.

General bildirib ki, Soyuq müharibə dövründə amerikalılar Qırmızı ordunun Polşaya hücumunu nüvə zərbələri ilə dayandırmağı planlaşdırırdılar. Və belə plan Rusiyanın mümkün təcavüzü qarşısında bu gün də qüvvədə qalır. Skşipçak qeyd edib ki, hərçənd bu ssenari Polşa üçün qəbuledilən deyil. “Lakin müharibə başlasa heç kim bizim mövqeyimizi soruşmayacaq. Və biz yerləşdiyimiz coğrafi məkanı dəyişdirə bilmərik”-o bildirib.

Polyak generalın fikrincə mümkün Rusiya təcavüzü barədə təhlükə təkcə indiki Rusiya ilə əlaqəli deyil, bu təhlükə Vladimir Putinin prezidentliyinin başa çatmasından sonra da qüvvədə qalacaq.