Köçəryanın həbsdən azad edilməsi Moskvadan verilən göstəriş nəticəsində mümkün olub.
Bu sözləri Axar.az-a sabiq dövlət müşaviri, politoloq Qabil Hüseynli deyib. Politoloq bildirib ki, Köçəryanın birdən-birə həbsdən azad olunması Paşinyanın Qarabağ klanına qarşı planlarının boşa çıxmasından xəbər verir:
“Bir müddət öncə Ermənistanın keçmiş prezidenti Serj Sərkisyan Moskvada təlimatlar aldıqdan sonra dərhal Xankəndiyə gəldi və orada Qarabağ klanının Paşinyana qarşı tədbirlərini müzakirə etdi. Bundan əvvəl isə qondarma rejimin parlamentinin üzvləri Paşinyana müraciət edərək Köçəryanın həbsdən azad edilməsi tələbini irəli sürmüşdülər. Belə görünür ki, bu hadisələrin bir-biri ilə bağlılığı var və bunlar bir mərkəzdən idarə olunur. Zənnimcə, Moskva artıq Paşinyanla bağlı ciddi istiqamət götürməyə başlayıb. Paşinyanla bağlı ciddi planların həyata keçirilməsi isə Qarabağ klanına həvalə edilib. Bu işlərin koordinatları kimi Serj Sərkisyan və Robert Köçəryan çıxış edəcək. Bu fonda hesab edirəm ki, Köçəryanın həbsdən azad edilməsi Moskvadan verilən göstəriş nəticəsində mümkün olub”.
Politoloq qeyd edib ki, Rusiyanın Köçəryanla bağlı hərəkətə keçməsi Qarabağ klanının sıralarında ciddi ruh yüksəkliyinə səbəb olub:
“Serj Sərkisyanın rəhbərlik etdiyi partiyanın sıralarında da ciddi dəyişikliklər baş verir. Sərkisyan və Köçəryan təkcə Qarabağ klanını deyil, Ermənistanda ciddi əlaqələri olan iş adamları və kommersiya şəbəkələrini də öz ətrafında birləşdirir, cəmiyyətdə antipaşinyan əhval-ruhiyyəsini gücləndirməyə çalışırlar. Hətta bu gün Ermənistan cəmiyyətində belə bir fikir də geniş yayılmaqdadır ki, üzü payıza doğru Moskvanın Paşinyana qarşı həmlələri başlayacaq və bu həmlələr onun hakimiyyətinin süqutuna gətirib çıxaracaq. Ona görə də bu istiqamətdə Qarabağ klanı və onun yaxın ətrafının təşkilatlanması prosesi sürətləndirilir. Nəticə etibarilə də cəmiyyətdə ciddi qütbləşmə gedir, hətta Ermənistanda Rusiyanın əvvəlki təsirinin bərpa ediləcəyi və bütövlükdə rusiyapərəst siyasətin qələbə çalacağı ilə bağlı fikirlər genişlənir. Moskva hesab edir ki, Paşinyan onun üçün müəyyən edilmiş qırmızı xətləri çoxdan keçib və bunun nəticəsində də Rusiya-Ermənistan münasibətlərinə xələl gəlib. İndi Paşinyan bunun bədəlini ödəməlidir. Bütün bunlar isə Ermənistan cəmiyyətini silkələməkdən ötrüdür və Paşinyanın mövcud reytinqinə ciddi zərbələr vurulmaqdadır. Hər halda belə görünür ki, Ermənistan cəmiyyətini ciddi sarsıntılar gözləyir və bu yeni hakimiyyət dəyişikliyinə qədər gedib çıxa bilər”.
Qeyd edək ki, Ermənistan Apellyasiya Məhkəməsi ölkənin keçmiş prezidenti Robert Köçəryan haqqında çıxarılmış həbs qərarını ləğv edib.