Bu gün Rusiyanın paytaxtı Moskva şəhərində Liviyada atəşkəs rejiminin tətbiq edilməsi ilə bağlı rəsmi razılaşma imzalanacaq. Bunun üçün Rusiyada tərəflərin liderləri – Liviya Milli Ordusunun başçısı Xəlifə Hafter ilə Milli Barışıq Hökumətinin rəhbəri Fayiz Sarac görüşəcəklər.

Liviya Ali Dövlət Şurasında qeyd edilib ki, Moskvada bu razılaşmanın imzalanması Liviyada yeni müharibənin başlanması təhlükəsinin dayandırılmasına və mövcud ikihakimiyyətlilik böhranının siyasi-diplomatik həlli prosesinin başlanmasına imkan yaradacaq.

General Hafter artıq Moskvadadır, Türkiyədə danışıqlarını başa çatdıran Sarac isə yoldadır.

Hafterlə birlikdə Rusiyaya ölkənin şərq hissəsində fəaliyyət göstərən parlamentin spikeri Ail Saleh də gəlib. Saracı Ali Şuranın başçısı Xalid Mişrinin müşayiət edəcəyi gözlənilir.

Xatırladaq ki, Liviyada bazar günü axşamdan başlanan atəşkəs rejiminin təşəbbüskarı Türkiyə prezidenti Rəcəb Tayib Ərdoğanla Rusiya prezidenti Vladimir Putindir./Hurriyyet.org