Prezident İlham Əliyev iyunun 20-də Azərbaycan Respublikasının Dövlət Reklam Agentliyinin yaradılması haqqında Fərman imzalayıb.
 
Fərmana əsasən, ölkə ərazisində açıq məkanda reklam daşıyıcılarının yerləşdirilməsi, həmin reklam daşıyıcıları üzərində yerləşdirilməsi nəzərdə tutulan reklamların istehsalı (hazırlanması) və yayımlanması sahəsində vahid tənzimləməni və nəzarəti təmin etmək məqsədilə “Azərbaycan Respublikasının Dövlət Reklam Agentliyi” publik hüquqi şəxs yaradılıb.
 Dövlət Reklam Agentliyinin fəaliyyətinə Prezident tərəfindən vəzifəyə təyin edilən və vəzifədən azad edilən direktor rəhbərlik edir. Prezident Administrasiyası bu Fərmanda nəzərdə tutulmuş publik hüquqi şəxsin nizamnaməsinin layihəsini və təsisçisinin səlahiyyətlərini həyata keçirənlər barədə təkliflərini on beş gün müddətində hazırlayıb dövlət başçısına təqdim edəcək.
Prezidentin həmin gün imzaladığı Sərəncamla Aydın İbadov Dövlət Reklam Agentliyinin direktoru təyin edilib.
 Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov Modern.az-a deyib ki, məhz Agentliyin yaradılması ilə bağlı ötən gün  "Reklam haqqında" və "Dövlət rüsumu haqqında" qanunlara dəyişikliklərin edilməsi müzakirəyə çıxarılıb:
 “Bu, reklam bazarının inkişafına xidmət edəcək. Bildiyini kimi, Azərbaycanda reklam sahəsində bir pərakəndəlik var. Ümumilikdə reklamın yerləşdirilməsi, dizaynı, dillə bağlı problemlər mövcuddur. Bütün bunların həlli isə qanun layihəsində öz əksini tapıb”.
 Parlament üzvü deyib ki, reklam gəlirli sahə olmasına baxmayaraq, qarşıya qoyulan nəticələr əldə edilmir:
“Bakı şəhərində reklam bazarı faktiki olaraq Bakı şəhər İcra Hakimiyyətinin nəzarətində idi. İl ərzində dövlət büdcəsinə reklamdan 50-55 milyon manat daxil olurdu. Bizim hesablamalarımıza görə, dövlət büdcəsinə reklamdan 450-500 milyon manata yaxın olmalıdır. Göründüyü kimi, ortada ciddi çatışmazlıqlar var, gəlirlər təxminən 10 dəfə azdır”.