“Şərtə bax, ha” 
“Ermənistanın xarici işlər nazirinin müavini Şavarş Köçəryan İrəvanın Azərbaycanın Avrasiya İqtisadi Birliyinə üzvlüyünün əleyhinə olmadığını, ancaq şərtləri olduğunu dedi: “Birincisi, Azərbaycan Ermənistanın blokadasına son qoymalıdır. İkincisi, Azərbaycan Ermənistana qarşı düşmən münasibətdən əl çəkməlidir”. Muxalifət.az xəbər verir ki, bu barədə “Atlas” Araşdırmalar Mərkəzinin rəhbəri, politoloq Elxan Şahinoğlu bildirib.
 
“Sən soruş ki, Azərbaycan Avrasiya İqtisadi Birliyinə üzv olmaq istəyir, ya yox?” 
“Şərtə bax, ha! Sən hələ bir soruş ki, Azərbaycan Avrasiya İqtisadi Birliyinə üzv olmaq istəyir, ya yox? Qazaxıstan və Qırğızıstan Avrasiya İqtisadi Birliyinin üzvləridirlər, buna baxmayaraq yola getmirlər, sərhədləri yarıişlək vəziyyətdədir”, - deyə politoloq əlavə edib.
 
“Şavarş Köçəryanın “şərtləri” Bakıdan çox, Moskvaya ünvanlanıb” 
Şahinoğlu qeyd edib ki, İrəvanın qulağına çatıb ki, Rusiya Azərbaycanı Avrasiya İqtisadi Birliyinə dəvət edir və bu məsələdə Ermənistanın mövqeyi nəzərə alınmayıb: “Əslində, Şavarş Köçəryanın “şərtləri” Bakıdan çox, Moskvaya ünvanlanıb ki, “bizim rəyimizi niyə nəzərə almırsınız?”. Yəni qul ağasına barmaq silkələyir”.
 
“Şavarş Köçəryan və onun naziri iradını Lavrov bölgəni tərk etdikdən sonra bildirib” 
“Rusiyanın xarici işlər naziri Sergey Lavrov Bakıda mətbuat konfransında “Azərbaycanın Avrasiya İqtisadi Birliyində üzvlüyünə ancaq şad olardıq” fikrini dilə gətirdi. Bu zaman Lavrov üzvlük üçün Azərbaycan qarşısında hansısa şərti söyləmədi. Şavarş Köçəryan və onun naziri iradını Lavrov bölgəni tərk etdikdən sonra bildirib. İşğal davam edə-edə hansısa amorf təşkilatda üzvlük naminə Azərbaycanın Ermənistanın blokadasına son qoyacağını və Ermənistana qarşı düşmən mövqeyindən əl çəkəcəyini İrəvan ancaq yuxusunda görə bilər”, - deyə politoloq vurğulayıb.