Qarabağda hərbi qiyama çağırış edildi - “AZƏRBAYCANA TORPAQ QAYTARMAQ” MƏSƏLƏSİ, YENİLƏNİB

Baxış sayı:
3439

Ermənistan müdafiə nazirinin keçmiş müavini, qondarma “dqr prezidentinin” müşaviri Artur Aqabekyan “Erməni Milli Hərəkatı”nın nümayəndəsi Zoya Tadevosyanın Dağlıq Qarabağ ətrafındakı işğal edilmiş rayonların Azərbaycana qaytarılmalı olduğu barədə bəyanatına cavab olaraq əsgərləri küçələrə çıxmağa çağırıb.

Ermənistan KİV-ləri xəbər verir ki, Aqabekyan Ermənistanda Azərbaycana torpaq qaytarmaq tərəfdarlarının son zamanlar “fəallaşmasına” cavab olaraq Dağlıq Qarabağ sakinlərini küçələrə çıxmağa səsləyən keçmiş səhra komandiri, “dqr prezidentinin” xüsusi tapşırıqlar üzrə nümayəndəsi Arşavir Qaramyana dəstək verib. O, keçmiş döyüş yoldaşlarına, əsgərlərə və zabitlərə çağırış edərək onları Arşavir Qaramyanın çağırışını dəstəkləməyə, küçələrə çıxıb iradə nümayiş etdirməyə və “təhlükəli proseslərə” münasibət bildirməyə səsləyib.

*   *   *12:23

Ötən gün Yerevanda keçirdiyi mətbuat konfransında Dağlıq Qarabağ ətrafındakı rayonların “zəbt edildiyi” və bütün beynəlxalq normalara görə Azərbaycan əraziləri olduğu haqda bəyanat verən erməni siyasətçiyə hücumlar başlayıb. Virtualaz.org erməni KİV-lərinə istinadən xəbər verir ki, Dağlıq Qarabağdakı qondarma rejimin “administrasiya sözçüsü” David Babayan “Erməni Milli Konqresi” partiyasından Zoya Tadevosyanın dediklərini “xəyanət, satqınlıq” adlandırıb.

“Bu milli maraqların satılmasıdır, mənəvi deqradasiyadır, ümid ancaq ona qalır ki, həmin qadının başı özündə deyil”-Babayan bildirib. O, Ermənistanda belə düşünən adamların olmasını “qorxulu” hesab edir, bildirir ki, belə adamlar küçəyə çıxmaqdan utanmalıdır.

Qondarma “dqr prezidentinin” xüsusi tapşırıqlar üzrə nümayəndəsi, keçmiş səhra komandiri və Dağlıq Qarabağın xüsusi xidmət orqanlarının rəhbəri Arşavir Qaramyan da Tadevosyanın bəyanatını “yolverilməz” adlandırıb. O, Ermənistanda son vaxtlar ərazilərin qaytarılması barədə danışan siyasətçilərin, politoloqların fəallaşdığını bildirir. Qaramyan “bu cür qanunsuz hərəkətlərin davam edəcəyi halda” Qarabağ ermənilərini küçələrə çıxmağa çağırır.

*   *   *11:15

Yerevanda “Erməni Milli Konqresi” partiyasını təmsil edən Zoya Tadevosyan iyulun 31-də keçirdiyi mətbuat konfransında deyib ki, Dağlıq Qarabağ ətrafındakı rayonlar “zəbt olunub” və “Dağlıq Qarabağın ərazisi” deyil.

“Biz bu əraziləri “azad olunmuş” kimi xarakterizə edirik, lakin siz yaxşı bilirsiniz ki, o zəbt edilmiş ərazilərdir”-Tadevosyan bildirib.

Erməni siyasətçinin sözlərinə görə, diplomatiyada və ya beynəlxalq hüquqda qəbul edilmiş istənilən normalara görə bu ərazilər erməni əraziləri deyil. “Doğrudanmı danışıqlar masasında azad edilmiş ərazilərin məsələsi dayanır? Bu zəbt edilmiş ərazilərdir, Azərbaycan əraziləridir. Danışıqlar isə Qarabağın öz müqəddəratını təyin etməsi məsələsi ətrafında aparılır”-Zoya Tadevosyan belə deyib.

“Aravot” qəzeti yazır ki, onun dedikləri mətbuat konfransına toplaşmış jurnalistlər arasında anlaşılmazlıq yaradıb(virtualaz.org).