Gəncə şəhər sakini Arzu Qasım oğlu Məmmədov tərəfindən Muxalifet.az saytının redaksiyasına şikayət məktubu daxil olub. Saytımız vasitəsilə Azərbaycan Respublikasının Dövlət İmtahan Mərkəzinin (DİM) sədri Məleykə Abbaszadəyə müraciət edən şikayətçi yazır:
“Hörmətli Məleykə xanım!
Xeyli vaxtdır ki, Gəncə şəhərində qabiliyyət imtahanları keçirilir. Bu imtahanlar əsasən Azərbaycan Texnologiya Universitetində və Gəncə Dövlət Universitetində keçirilir. Azərbaycan Texnologiya Universittində "dizayn", Gəncə Dövlət Universitetində isə "bədən tərbiyəsi və idman", "təsviri-incəsənət müəllimliyi", "musiqi müəllimliyi" ixtisasları üzrə qabiliyyət imtahanları keçirilir. Bu qabiliyyət imtahanlarının keçirilməsinə rəhbərliyi Dövlət İmtahan Mərkəzinin Gəncə Regional Bölməsinin müdiri Nəsimi Məmmədov həyata keçirir. Bu imtahanlarda Nəsimi Məmmədovun rəhbərlik etdiyi regional qəbul komissiyasının işçiləri Babək və Vüsal adlı şəxslər xüsusi canfəşanlıq göstərirlər.
Gəncə Dövlət Universitetinin idman klubunun sədri Xəqani Umudov hazırlıq kursu açıb. Bu şəxs müxtəlif abituriyentləri tapır, qabiliyyət imtahanından qiymət yazdıracağına söz verir. Xəqani Umudov heç bir elmi dərəcəsi olmayan savadsız bir şəxsdir, o, GDU-nun idman ixtisasını güc-bəla ilə bitirib. Amma Xəqani Umudov regional qəbul komissiyasının işçilərinə abituriyent daşımaqda pərgardır.
Xaqani Umudov abituriyentlərin hər birindən qabiliyyət imtahanından  qiymət yazılması üçün 2500-3000 manat pul alır. Sonra  isə pul aldığı şəxslərin siyahısını və hər bir üçün 2000 manatdan Nəsimi müəllimə pul verir.

Bu şəxslər Bakı şəhərindən Sizin tapşırığınızla gələn komissiya üzvlərini də ələ alıblar. Bunlar elə abituriyentlərdən qiymət yazmaq üçün pul alıblar ki, məsələn, idman ixtisasında turnikdə çəkilə bilmir, tullana bilmir. Elə abituriyent var ki, çəkisi 100 kq-dan çoxdur, 50 metr məsafəyə qaça bilmir, amma idmandan qabiliyyət imtahanından keçmək üçün Gəncə Dövlət Universitetinin idman klubunun sədri Xaqani Ümudov tərəfindən pulları alınaraq Nəsimi Məmmədova ötürülüb.
Xaqani Umudov bütün günü Nəsimi Məmmədov, Babək, Vüsal adlı işçilər və Bakıdan gələn komissiya üzvləri ilə bir yerdədir. Bu şəxslər Xaqani Umudovun şəxsi maşını ilə şəhərin kababxanalarında öz keflərindədir.
"Təsviri-incəsənət müəllimliyi" ixtisasında Nəsimi Məmmədov kimlərə qiymət yazdırmaq istəyirsə, kənar adamların əvvəlcədən çəkdiyi şəkilləri sənədlərin arasına qoyur, abituiyent çəkən şəkilləri isə cırıb tullayır. Bu məqsədlə istifadə olunacaq hazır şəkillər artıq Nəsimi Məmmədovdadır.
Hörmətli Məleykə xanım, xahiş edirik ki, bu özbaşınalıqlarla bağlı lazımi tədbirlər görəsiniz”.

Muxalifet.az
Redaksiydan: Qarşı tərəfin mövqeyini dərc etməyə hazırıq.