Azərbaycan Respublikasının Dövlət Neft Fondunun İcraçı direktoru Şahmar Mövsümov vəzifədən azad edilib. Muxalifet.az xəbər verir ki, Prezident İlham Əliyev Ş.Mövsümovu prezidentin köməkçisi vəzifəsinə təyin edib. Qeyd edək ki, Ş.Mövsümov 31 yanvar 1972-ci ildə anadan olub, 1990 - 1995-ci illərdə Moskva Dövlət Beynəlxalq Əlaqələr İnstitutunun Beynəlxalq İqtisadi Əlaqələr fakültəsində təhsil alıb, ixtisasca iqtisadçıdır. O, 2003 - 2004-cü illərdə Harvard Universitetinin Con Kennedi adına Hökumət Məktəbinin dövlət idarəçiliyi üzrə magistr təhsili alıb. 1995 - 2005-ci illərdə Azərbaycan Respublikası Mərkəzi Bankında beynəlxalq əlaqələr məsələlərinin təşkili, valyutanın idarə olunması və maliyyə bazarlarının inkişafı sahələri üzrə baş iqtisadçı, qrup rəhbəri, şöbə rəisi, departament direktorunun müavini, departament direktoru, İdarə Heyəti sədrinin baş müşaviri vəzifələrində çalışıb. 2005 - 2006-cı illərdə Mərkəzi Bankın Baş direktoru vəzifəsində işləyib. 15 may 2006-cı ildən Azərbaycan Respublikası Dövlət Neft Fondunun İcraçı Direktoru vəzifəsində çalışıb. 2006 - 2017-ci illərdə Mədən Hasilatı üzrə Şəffaflıq Təşəbbüsünün hökumət Komissiyasının sədri olub. 2013-cü ildən Bank VTB ASC-nin Müşahidə Şurasının müstəqil üzvüdür. 2017-ci il 5 aprel tarixindən Hasilat Sənayesində Şəffaflıq üzrə Komissiyanın sədridir. 2018-ci il 14 mart tarixindən Azərbaycan Beynəlxalq Bankının Müşahidə Şurasının sədridir. 2018-ci il 20 sentyabr tarixindən Suveren Fondların Beynalxalq Forumunun idarə heyətinin üzvüdür. İngilis, fransız, rus, türk dillərini bilir. Evlidir, üç övladı var.//Publika