Muxalifet.az xəbər verir ki, ABŞ prezidenti Donald Tramp Fransa prezidenti Emmanuel Makronun ABŞ, Rusiya və Çindən müdafiə olunmaq üçün ümumavropa ordusu yaratmaq təklifini “çox təhqiredici” adlandırıb. Amerikanın rəhbəri “Tvitter”dəki səhifəsində yazıb: “Fransa prezidenti Emmanuel Makron ABŞ, Rusiya və Çindən müdafiə olunmaq üçün Avropanın öz silahlı qüvvələrini yaratmasını təklif edib. Bu, çox təhqiredicidir, lakin ola bilsin ki, Avropa əvvəlcə özünün NATO-dakı ABŞ tərəfindən subsidiya verilən payını ödəsin!"
Xəbər verildiyi kimi, bir neçə gün bundan əvvəl Makron ABŞ-dan asılı olmayan “ümumavropa, o cümlədən, kibertəhlükəsizlik ordusu”nu yaratmağı təklif edib. Fransa prezidenti qeyd edib ki, Avropa öz daxilində gedən dramatik proseslərə və kiber məkana çoxsaylı müdaxilə cəhdləri ilə qarşılaşır.
Büdcəsinin nəhəng qismini ABŞ-ın ödədiyi NATO xərclərinə Trampın mənfi münasibəti bütün dünyaya bəllidir. O dəfələrlə bəyan edib ki, müttəfiqlər “müdafiə” üçün ABŞ-a daha çox pul ödəməlidirlər.