İsrail hüquq-mühafizə orqanları bu gecə Fələstində 32 nəfəri həbs ediblər.
Muxalifət.az xəbər verir ki, həbs edilənlərin hamısı terrorçuluq fəaliyyətində şübhəli biliniblər. Onlar sırasında HƏMAS liderlərindən biri olan şeyx Həsən Yusif də var. İddialara görə, Həsən Yusif məhz intifadaya çağırışa görə saxlanılıb.
Qeyd edək ki, Həsən Yusif dəfələrlə İsrail hüquq-mühafizə orqanları tərəfindən həbs edilib. 2004-cü ildə onun həbsi zamanı İsrail HƏMAS-ın demək olar ki, əsas rəhbər şəxslərinin hamısını məhv edə bilib. Bu, sonradan onun İsrailə çalışması haqqında iddiaların ortaya çıxmasına səbəb oldu, amma iddia təsdiqini tapmadı.
Həsən Yusiflə bağlı ən maraqlı fakt oğlu Musab Həsən Yusifə aiddir. Onun oğlu 2007-ci ildə Fələstindən ABŞ-a qaçıb. Buraya qaçdıqdan sonra o bəyanat yayaraq, uzun müddət İsrailin xeyrinə casusluq etdiyini bildirib. “Yaşıl şahzadə” ləqəbi ilə casusluq edən Musabın sayəsində İsrail HƏMAS-ın rəhbər şəxslərini ortadan qaldıra bilib.
Həsən Yusif isə oğlunun bu addımından sonra ondan rəsmən imtina edib.