İranın ABŞ sanksiyalarına görə dünya neft bazarında itirdiyi mövqeləri Rusiya və Səudiyyə Ərəbistanı tutur.
Muxalifet.az xəbər verir ki, bu iddia ilə İran mətbuatı çıxışı edib. Rusiyanı tənqid edən mətbuat “Rusiya sözdə dostdur”, “Putin öz mənfəətinə görə hər şeyə hazırdır”, “Rusların neft ətrafında oyunları”, “Rusiya İranı aldatdı”, “Rusiya müttəfiq, yoxsa rəqib?” başlıqları ilə materiallar dərc etməyə başlayıb. Mətbuat Moskvanı İrana qarşı Səudiyyə Ərəbistanı və ABŞ-la əməkdaşlıqda ittiham edib.
“Rusiya birinci dəfə deyil ki, İranın maraqlarına zərər vurur. Moskva bir daha sübut etdi ki, hər fürsətdə yalnız öz mənfəəti barədə düşünür. Putin öz maraqları üçün hər şeyi edəcək və o, artıq Vaşinqtonla müttəfiqliyə gedir”, - “Aftab Yəzd” qəzeti bildirib.
“İqtisad” qəzeti də Moskvanı sərt tənqid edərək, Rusiyanın İrana qarşı hər kəslə müttəfiqliyə hazır olduğunu deyib:
“Antiiran üçbucağı heç vaxt olmadığı qədər realdır. ABŞ Rusiya və Səudiyyə Ərəbistanı ilə birgə İranı neft bazarından çıxarmağı planlaşdırır”.