Göyçay rayon sakinləri tərəfindən Muxalifet.az-ın redaksiyasına şikayət məktubu daxil olub. Rayonun Potu kənd sakinləri Ələsgərov  Elnur Elman oğlu, Ağayev Elvin Əjdər oğlu, Feyzullayev Rahim Zülfü oğlu və Əliyev Arif Paşa oğlunun imzası ilə göndərilən məktubda Göyçay rayonunun sabiq icra başçısı Mübariz Ağayevin qardaşı oğlu Nicat Ağayevdən şikayət olunur:
“Bu şikayət məktubunda yazıb bildiririk ki, Göyçay rayonunun sabiq icra başçıs Mübariz Ağayevin qardaşı oğlu Nicat Ağayevun kommersiya maraqlarına görə, biz sakinlər təhlükə ilə üz-üzə qalmışıq. Nicat Ağayevin atası Maarif Ağayev “Azəravtoyol” ASC-nin 17 №-li Yol İstismar MMC-nin müdiri vəzifəsində işləmiş və təxminən 1 il əvvəl dünyasını dəyişmişdir. Nicat Ağayev atası bu vəzifədə işləyən vaxtdan bahalı, ağır texnika maşınları alaraq Göyçay çayından daş materiallarını qazaraq, satışı ilə məşğul olmağa başlamışdır. Əmisinin və atasının himayəsi ilə Nicat Ağayevin heç bir qanunu icazə almadan apardığı bu işlər Göyçay rayonunu Potu və Cəyirli kənd sakinlərinə ciddi təhlükələr yaratmışdır.
Bizim ailəyə məxsus olan Göyçay rayonu Potu kəndində yerləşən 3,45 hektar torpaq sahəsində min-bir əziyyətlə bağ salmışıq ki, hər il buradan tonlarla meyvə məhsulu götürüb, əldə edilən gəlirlə ailəmizi dolandırırıq, dövlətə xeyir veririk.
Göyçay rayonunun sabiq icra başçısı Mübariz Ağayevin qardaşı oğlu Nicat Ağayev bağımızın yaxınlığından keçən Göyçay çayında qanunsuz qazıntı işləri aparmaqla çayın məcrasını dəyişdirib yolumuzu dağıtmış, suvarma sistemini məhv etmiş və çox ciddi qəza vəziyyəti yaratmışdır.
“Azəravtoyol” ASC-nin 17 №-li Yol İstismar MMC-nin keçmiş müdiri Maarif Ağayevin oğlu Nicat Ağayev hazırkı müdir Rəşad Kərimovla əlbir olub ağır texnikalardan istifadə edərək, Göyçay çayında uzun müdətdir ki, qazıntı işləri apararaq çay materiallarının satışı ilə məşğul olurlar. Qanunsuz aparılan qazıntı işləri nəticəsində Göyçay çayının bu hissəsində məcrası dəyişmiş sakinlərin bağına gedən yol uçmuş, bağımızın da məhv olması təhlükəsi ilə üz-üzə qalmışıq”.
Şikayətçilər bildirir ki, vətəndaşlara məxsus bağ sahələri hər an məhv ola bilər: “Bu barədə heç bir tədbir görən yoxdur. Biz min-bir əziyyətlə bağ salıb məhsul götürüb, dövlətə və ailəmizə xeyir veririk. Bu cinayətkar vəzifəli şəbəkə isə öz maraqlarına görə dövlətə və vətəndaşlara küllü miqdarda ziyan vururlar.
Biz bu qanunsuzluq barədə Prezident İlham Əliyevə, Ekologiya və Təbii Sərvətlər Naziri Hüseyn Bağırova və digər orqanlara şikayət ərizələri ilə müraciət etmişik. Şikayət ərizəmizdə göstərdiyimiz faktlar yerində araşdırılmalıdır ki, “Azəravtoyol” ASC-nin 17 №-li Yol İstismar MMC-nin müdiri Rəşad Kərimov və Nicat Ağayev hansı qanuna əsasən Göyçay çayını plandan kənarda qazıb materiallarını satırlar?! Onların bu işi görmələrinə kim icazə verib və nə üçün onların bu işlərinə dövlət tərəfindən nəzarət edilmir? Əldə olunan küllü miqdarda gəlirə görə hara vergi ödəmələri, işlədilən işçilərlə əmək müqavilələrinin bağlanılması və bu işləri hansı planla, razılıqla edilməsi faktları yerində obyektiv araşdırılmalıdır. Araşdırlmalıdır ki, Ekologiya və Təbii Sərvətlər Nazirliyi və Göyçay Meliorasiya İdarəsi nə üçün bu qanunsuz fəlaiyyətin qarşısını almaq istəmir. Onların yaratdığı ciddi təhlükə araşdırılmalı və barələrində təcili, ciddi tədbirlər görülməlidir. Əks təqdirdə tezliklə dövlətə və vətəndaşlara daha çox ciddi ziyanlar dəyəcək, çay daşıb evləri uçuracaq, hətta insan təlafatı da olacaq.  Xahiş edirik, şikayət ərizəmizi bizim iştirakımızla yerində tam, hərtərəfli və obyektiv araşdırıb vəzifə səlahiyətlərindən sui-istifadə edib qanunsuz işlərlə məşğul olan şəxslər barədə təcili tədbirlər görülsün”.

Muxalifet.az

Redaksiyadan: Qarşı tərəfi dinləməyə hazırıq.