​Füzulidə sakinlər baş həkimin evinə hücum etdi

Baxış sayı:
530

Füzuli rayonunda baş həkimin evinə hücum ediblər.
 
Hadisə üç gün əvvəl rayonun Böyük Bəhmənli kəndində baş verib.
 
Bir qrup kənd sakini rayon Mərkəzi Xəstəxanasının baş həkimi Natiq Şükürovun yaşadığı mənzilə hücum edib.
 
N.Şükürov bildirib ki, övladının xeyir işi ilə əlaqədar olaraq məzuniyyət götürübmüş. Rayon ərazisində baş vermiş yol-nəqliyyat hadisəsi zamanı xəsarət alan iki nəfər xəstəxanaya yerləşdirilib. Məzuniyyətdə olmasına baxmayaraq, vəziyyətə özü nəzarət edərək xəstələrə lazımi tibbi yardım göstərilib. Ancaq yaralının qohumları onun evinə gələrək xəstələrə lazımi kömək edilmədiyini iddia edərək oğlu Araz Şükürovu döyüblər.
 
Məsələ ilə bağlı qarşı tərəfin nümayəndəsi, xəsarət alan şəxsin dayısı Elçin Əliyev isə bildirib ki, iyunun 26-da axşam saatlarında onun bacısı oğlanları ağır yol qəzasına düşüb. Müxtəlif dərəcəli bədən xəsarətləri alan iki nəfər rayon Mərkəzi Xəstəxanasına yerləşdirilib. Vəziyyətləri ağır olan gənclərə heç bir tibbi xidmət göstərilməyib. Onlar yaralıları Bakı şəhərində yerləşən xəstəxanalarının birinə yerləşdirmək üçün təcili tibb yardım avtomobili istəsələr də, xəstəxanadan verilməyib. Bildirilib ki, təcili tibb yardım avtomobili üçün baş həkim N.Şükürovun rəsmi icazəsi olmalıdır. Onlar baş həkimlə telefonla danışıb vəziyyəti izah etsələr də, həkim icazə verməyib. Bu səbəbdən onun yaxınları baş həkimin qaldığı evə gediblər. Bu zaman isə orada mübahisə düşüb.
 
Baş həkim rayon Polis şöbəsinə müraciət edib.
 
Faktla bağlı polis araşdırma aparır.