1994-cü ildən bugünədək ATƏT-in Minsk Qrupu həmsədrləri münaqişənin həlli istiqamətində hansısa ciddi bir irəliləyişə nail ola bilməyib.
Bu sözləri açıqlamasında analitik Ehtiram Aşırlı Qarabağ separatçılarının lideri Bako Saakyanın Fransaya səfərini və bu ölkədə keçirdiyi görüşləri şərh edərkən deyib. O bildirib ki, Azərbaycan Prezidenti İlham Əliyev dəfələrlə çıxışlarında Dağlıq Qarabağ münaqişəsinin həlli istiqamətində ATƏT-in Minsk Qrupu həmsədrlərini ədalətlə, beynəlxalq prinsiplərə uyğun addımlar atmağa və fəal olmağa səsləyib:
“Bu gün münaqişənin həlli ilə bağlı ciddi variant ortaya qoyması üçün həmsədrlərin əlində lazım olan bütün sənədlər var. BMT-nin qətnamələri, beynəlxalq təşkilatların qərarları və beynəlxalq hüquq normaları diktə edir ki, Dağlıq Qarabağ münaqişəsi Azərbaycanın ərazi bütövlüyü çərçivəsində həll olunsun. ABŞ da, Rusiya da Dağlıq Qarabağ məsələsinin həlli ilə əlaqədar xeyli dərəcədə öz fikirlərini konkret olaraq ifadə edirlər. Təəssüf ki, Fransa erməni lobbisinin güclü təsiri altında beynəlxalq hüquq normalarına zidd addımlar atmağa davam edir”.
Politoloq bildirib ki, təkcə Bako Saakyanın Fransaya səfəri deyil, bundan öncə Fransa bələdiyyə üzvləri və sədrlərinin dağlıq Qarabağa gəlməsi və “ikitərəfli müqavilələrə” baş vurduqlarını müşahidə etdik:
“Ermənistanın özü tərəfindən tanınmamış, işğalçı ordunun dəstəyi ilə yaradılan qanunsuz qurumun nümayəndəsinə qarşı bu cür münasibət artıq dözülməzdir. Hesab edirəm ki, Fransa bu məsələdə bitərəf olmadığını və bu ölkədəki erməni lobbisinin güclü təsiri ilə addımlar atdığını artıq dəfələrlə təsdiqləyib. Belə olduğu halda Fransanın həmsədrlikdən uzaqlaşdırılması ən məntiqli addım olardı. Minsk Qrupu yeni, daha effektiv və tərəfsiz formatda yenidən təşkil olunmalıdır”.