“Şəkildə gördüyünüz super avtomobilin modeli Mercedes–Benz S Class olsa da, Brabus şirkəti tərəfindən xüsusi qaydada yığılıb, 8 silindiri var, mühərrikinin həcmi 5912 kv. sm-dir, 850 at gücünə malikdir, maksimum sürəti saatda 350 km-dir".
Hurriyyet.org xəbər verir ki, bu barədə İqtisadi Tədqiqatlar Mərkəzinin rəhbəri, iqtisadçı alim Qubad İbadoğlu “feysbuk” səhifəsində qeyd edib.
 
“Sahibinin və ya istifadəçisinin kim olmasını bilmirəm. Bilən varsa, yazsın, maraqlı olardı. Yalnız onu deyə bilərəm ki, nömrə nişanına görə bu xidməti avtomobil Azərbaycan Respublikasının icra hakimiyyətinə məxsusdur və Bakıda dövlət qeydiyyatından keçib”.
Q. İbadoğlu əlavə edib ki, avtomobilin zavod qiyməti 381 min dollar və ya hazırkı məzənnə ilə 650 min manatdır: “Bu avtomobilin yalnız fabrik satış qiymətini ödəmək üçün hazırkı məzənnə və orta aylıq əmək haqqı ilə ən azı 103 il, minimum əmək haqqı ilə 416 il işləmək lazımdır”.
 
“Görəsən, bu maşını idxalı zamanı büdcəyə ödəniş olubmu?”
 
İbadoğlu yeri gəlmişkən onu da qeyd edib ki, istismar müddəti 1 ildən az olan belə avtomobilin gömrük rəsmiləşdirilməsi üçün büdcəyə 287 min 695 manat 72 qəpik aksiz və əlavə dəyər vergisi də daxil olmaqla cəmi gömrük rüsumları ödənilməlidir: “Görəsən, bu maşını idxalı zamanı büdcəyə ödəniş olubmu?”
“Bu avtomobilin yalnız zavod dəyəri ayrı-ayrılıqda dövlətin 18 min 55 məcbur köçkünə 1 ay ərzində yaşamaq üçün verdiyi müavinətin, valideynlərini itirmiş və valideyn himayəsindən məhrum olmuş 11 min 818 uşağın qəyyumlarına verdiyi birdəfəlik müavinətin, sağlamlıq imkanları məhdud olan 18 yaşadək 6 min 784 uşağa ayırdığı aylıq sosial müavinətin, 3 min 163 pensiyaçıya ödədiyi orta aylıq təqaüdün məbləğinə bərabərdir. Nəzərə alın ki, bu hesablama yalnız 1 avtomobilin dəyəri üzərində qurulub. Heç şübhə etmirəm ki, Azərbaycanın dövlət orqanların bu səviyyədə, hətta ondan da bahalı avtomobillər onlarladır”, - deyə iqtisadçı vurğulayıb.
Q. İbadoğlu sual edir ki, bu qədər israfçılığa rəvac verən, məmuru 650 min manat zavod dəyəri olan xidməti avtomobildə gəzən prezidentin son fərmanı ilə yaşa görə aylıq sosial müavinəti 6 manat 60 qəpik, əlilliyə görə aylıq sosial müavinəti 5 manat 45 qəpik, ailə başçısını itirməyə görə aylıq sosial müavinəti 6 manat 10 qəpik, sağlamlıq imkanları məhdud olan 18 yaşadək uşaqların aylıq sosial müavinətini 7 manat 40 qəpik artırılmasını nə dərəcədə ədalətli hesab etmək olar?