Ermənistan müdafiə nazirinin keçmiş müavini, Qarabağ separatçılarının liderinin müşaviri Artur Aqabekyan Erməni Milli Hərəkatının nümayəndəsi Zoya Tadevosyanın Dağlıq Qarabağ ətrafındakı işğal edilmiş rayonların Azərbaycana qaytarılmalı olduğu barədə bəyanatına cavab olaraq əsgərləri küçələrə çıxmağa çağırıb.
Muxalifet.az erməni KİV-lərinə istinadən xəbər verir ki, Aqabekyan Ermənistanda Azərbaycana torpaq qaytarmaq tərəfdarlarının son zamanlar “fəallaşmasına” cavab olaraq Dağlıq Qarabağ sakinlərini küçələrə çıxmağa səsləyən keçmiş səhra komandiri, “dqr prezidentinin” xüsusi tapşırıqlar üzrə nümayəndəsi Arşavir Qaramyana dəstək verib.
O, keçmiş döyüş yoldaşlarına, əsgərlərə və zabitlərə çağırış edərək onları Arşavir Qaramyanın çağırışını dəstəkləməyə, küçələrə çıxıb iradə nümayiş etdirməyə və “təhlükəli proseslərə” münasibət bildirməyə səsləyib.
Qeyd edək ki, İrəvanda Erməni Milli Konqresi Partiyasını təmsil edən Zoya Tadevosyan iyulun 31-də keçirdiyi mətbuat konfransında Dağlıq Qarabağ ətrafındakı rayonların işğal edildiyini bildirib. O deyib ki, biz bu əraziləri “azad olunmuş” kimi xarakterizə edirik, lakin siz yaxşı bilirsiniz ki, o zəbt edilmiş ərazilərdir.
“Doğrudanmı danışıqlar masasında azad edilmiş ərazilərin məsələsi dayanır? Bu zəbt edilmiş ərazilərdir, Azərbaycan əraziləridir. Danışıqlar isə Dağlıq Qarabağın öz müqəddəratını təyin etməsi məsələsi ətrafında aparılır”, - Zoya Tadevosyan deyib.
Dağlıq Qarabağdakı separatçıların “administrasiya sözçüsü” David Babayan isə Zoya Tadevosyanın dediklərini “xəyanət, satqınlıq” adlandırıb.
“Bu milli maraqların satılmasıdır, mənəvi deqradasiyadır, ümid ancaq ona qalır ki, həmin qadının başı özündə deyil”, - Babayan bildirib.
Qondarma “dqr prezidentinin” xüsusi tapşırıqlar üzrə nümayəndəsi, keçmiş səhra komandiri və Dağlıq Qarabağ separatçılarının “xüsusi xidmət orqanları”nın rəhbəri Arşavir Qaramyan da Tadevosyanın bəyanatını “yolverilməz” adlandırıb. O, Ermənistanda son vaxtlar ərazilərin qaytarılması barədə danışan siyasətçilərin, politoloqların fəallaşdığını bildirib. Qaramyan “bu cür qanunsuz hərəkətlərin davam edəcəyi halda” Qarabağ ermənilərini küçələrə çıxmağa çağırıb.