İnvestorlar “Netfliks” şirkətinin abunəlik potensialını 350 milyon olaraq qiymətləndirirlər. Şirkət də gözləntiləri doğrultmaq üçün vasitələr axtarır. Televizor, planşet və telefonlar əməkhaqqının ABŞ-dan dəfələrlə aşağı olduğu ölkələrdə istehsal olunur, amma standart abunə haqqının qiyməti çox yüksəkdir.
Axar.az xəbər verir ki, bu sözləri gürcü jurnalist, prodüser Tina Kandelaki çağdaş dünyada televiziya və internet arasında gedən rəqabətlə bağlı yazıb. O, bəzi maraqlı faktları açıqlayıb:
“Netfliks”in tapdığı çıxış yolu o qədər də orijinal deyil: HD keyfiyyətini kəsmək, akkauntu bir qurğu ilə məhdudlaşdırmaq və ay ərzində 10 dollarlıq abunə haqqını 4 dollara endirmək. İndi gözləyirik, görək, 137 milyon abunəçi necə olacaq...
Və ya gözləmirik, çünki “Netfliks” lokal milli şəbəkələr üçün ciddi təhlükə yaradır. Mən min dollardan mərc gələrəm ki, üç il ərzində yeni regional seqmentlər yaranacaq və bu seqmentlərdə ciddi tamaşaçılar tərəfindən sevilən istənilən şouya baxmaq mümkün olacaq.
Televiziyalar internet xidmətləri ilə rəqabəti davam etdirə bilmir. Çünki onlar öz fəaliyyətini müəyyən proqram çərçivəsinə sığışdırmağa məcburdur. İzləyici üçün “Haus of cards” və ya “Majorov”u bir kliklə istədiyi zaman izləmək daha rahatdır.
Televiziyanın yeni dünyada rəqabəti necə qazanacağını çox böyük maraqla izləyirəm. Amerikalılar tamaşaçı üçün fəal mübarizə aparırlar, minlərlə istehsalçı şirkət və milyonlarla insan bunun uğrunda çalışır. Nəticədə biz ABŞ-da televiziya reytinqlərinin artdığını görürük.
Bu müharibəni qazanmaq olarmı? Yəqin ki! Mən əminəm ki, hər ambisiyalı rus prodüser bunu istəyir. Bunun üçün nə etmək lazımdır? Öz imkanlarından daha çox işləmək. Çünki indi Rusiyada həm sənaye, həm kreativ industriyada istehsalçılıq çox aşağıdır: “Market Votç” analitiklərinin sözlərinə görə, Rusiyada bu, 5,6 dollar, ABŞ-da isə 33,7 dollardır.
Bu fərqi necə aradan qaldırmaq olar? Günümüzün yarısını internetdə keçirir, nahara çox vaxt sərf edirik, saat altıda isə evimizə qaçırıq. Bu problem məni çoxdandır düşündürür. Bu paradiqmada biz, sözsüz ki, məğlub olacağıq”.