Suriyada 2011-ci ildə vətəndaş müharibəsi başlayandan bəri turizm elə böyük bir zərbə alıb ki, Somar Hazim Dəməşqdəki otelini bağlamaq məcburiyyətində qalıb.

Milyonlarla suriyalı ölkəni tərk etdiyi bir vaxt Somar işini itirməsinə baxmayaraq Dəməşqdə qalmağa üstünlük verib. O, 3 il əvvəl Suriya hökumətinin nəzarətindəki şəhərin keçmiş məhəlləsində bir bar açıb.
Bu ay Dəməşq dünyada ən az yaşanılacaq şəhər seçilsə də, Somar şəhərdə gecə həyatının canlandığını deyir.

Mərmilər altında içki

Somar 2015-ci ildə barını açan vaxt, 4 ildir davam edən vətəndaş müharibəsi səbəbiylə iş qurmağın nə qədər çətin olduğunu bilirdi.

"Müharibənin ortasında barı açanın kim olduğunu görmək üçün insanlar bura gəlirdi", BBC-ə danışan Somar deyir.

Somarın dostlarının çoxu müharibə davam etdiyi bir vaxt bara sərmayə qoymağın axmaqlıq olduğunu deyirdilər.

Somar da bunun bir qumar olduğunu qəbul edir. Lakin bu, ona pul qazandıran bir qumardır: "Mərmilər altında bara gedib içki içə bilərsiniz. Bir çox insan üçün bu çox cəlbedicidir".

Yayın əvvəlində Rusiya qüvvələrinin köməyilə Suriya hökuməti müxalifətin nəzarətində olan son Dəməşq məhəllərini də ələ keçirib.

Somar hesab edir ki, Dəməşqdəki nisbi sabitlik şəhərin gecə həyatını özünə qaytarıb.

"Əvvəlcə üç və ya dörd bar var idi. İndi isə eyni küçədə ən azı otuz belə yer var", o deyir.

Suriyanın paytaxtında son yeddi illə müqayisədə həyat normal vəziyyətə gələ bilər. Amma müharibə hələ də bitməyib.

ABŞ, Suriya və İraqda hələ daha 20-30 minə qədər İD (Özünü İslam Dövləti elan edən qruplaşma) döyüşçüsünün olduğunu güman edir.

Somar isə nikbindir: "Dəməşqdə pis günlər keçirdik. Dəməşq müharibədən əvvəkli şəhərlə eyni deyil, lakin başqa bir şəhərə çevrilir".

Somar "turizm canlanan kimi" Dəməşqdəki otelini açacağna ümid edir.

"Hesab edirəm ki son yeddi ildə nə baş verdiyini unutmaq üçün zamana ehtiyacımız var. Məncə gələcək daha yaxşı olacaq", o deyir.