ABŞ-ın Cənubi Karolina ştatından respublikaçı senator Lindsi Qrem prezident Donald Tramp administrasiyasının Koreya Xalq Demokratik Respublikası (KXDR) barəsində sonrakı hərəkətləri haqqında öz proqnozunu verib.
Muxalifət.az xəbər verir ki, bu haqda “The Atlantic” nəşri bildirib.
Onun fikrincə, Birləşmiş Ştatlar və Şimali Koreya arasında birbaşa hərbi toqquşma ehtimalı hazırda 70 faiz təşkil edir. O əmindir ki, KXDR lideri Kim Çen In yeni nüvə sınaqları haqqında qərar qəbul edərsə, Ağ Ev daha dözməyəcək və birinci zərbəni məhz ABŞ vuracaq.
“Bu, yalnız Şimali Koreyanın nüvə təsislərinin məhvi olmayacaq, həm də rejimə qarşı ümumi müharibə olacaq”, - Qrem deyib.
Senator vurğulayıb ki, Amerika rəhbərliyinin əsas məqsədi dünyanı nüvə təhlükəsindən xilas etməkdir.
Daha əvvəl Ağ Evdən bildiriblər ki, Vaşinqton yalnız ballistik raketlərin işə salınması üzrə siyasətin tamamilə dəyişdiriləcəyi halda Pxenyanla danışıqlar stoluna oturacaq.