​Azərbaycanda ŞOK HADİSƏ: 5 yaşından yanlış diaqnozla müalicə aldı, 21 il sonra...

Baxış sayı:
343

Azərbaycan Tibb Universitetinin (ATU) Tədris Cərrahiyyə Klinikasında 21 il öncə səhv diaqnozla müalicə alan xəstə uğurlu əməliyyat olunub.
Publika.az xəbər verir ki, klinikanın Torakal cərrah Arif Ağayev xəstədə anadangəlmə ön divar aralığında (ürəklə ağciyərlər arasında) törəmə olduğunu deyib.
Onun sözlərinə görə, xəstə illərdir müxtəlif xəstəliklərə görə yanlış müalicə edilib.
“Xəstə indi 27 yaşındadır. 5-6 yaşından davamlı öskürək, boğulma, davamlı yüksək temperaturdan, döş qəfəsində şiddətli ağrılar şikayətləri ilə müxtəlif xəstəxanalarda uzun müddətli müalicə alıb. Lakin əlbəttə, həmin illər Azərbaycanda səhiyyənin səviyyəsi indiki ilə müqayisədə yüksək deyildi və ona görə xəstəyə səhv diaqnoz qoyulub, onun anadangəlmə qüsuru yanlış dəyərləndirilib. Xəstə davamlı olaraq vərəm, astma, pnevmaniyadan və s. kimi yanlış xəstəliklərdən müalicə alıb”.
Torakal cərrah A.Ağayevin sözlərinə görə, xəstə klinikaya müraciət etdikdə davamlı bəlğəmli öskürürək, ara-sıra temperaturun yüksəlməsindən, təngnəfəslikdən şikayət edib: “Xəstə nə qədər müalicə olunsa da, bu problem aradan qalxmırmış. Biz gəncin əlindəki müayinə nəticələrinə nəzər saldıq, lazımi yeni müayinələr də apardıq. Aparılan müayinələr əsasında xəstənin ön divar aralığı dediyimiz bölgəsində törəmə olduğu aşkarlandı. Bu, anadangəlmə dermoid sist və ya teratoma kimi dəyərləndirilib. Törəmənin xoşxassəli olduğu təsdiqləndi”.
Məlum olub ki, bu törəmə 21 il öncə irinləyərək ağciyərə yol açıb. Bu illər ərzində törəmə fasiləsiz olaraq irinləyib, iki orqan arasında yaranmış yoldan bu irin ağciyərə tökülüb. Ona görə də həkimlər bunu ağciyər problemi kimi qəbul ediblər.
Arif Ağayev bildirir ki, uzun sürən müayinələrdən sonra, xəstədə vərəm olmadığı təsdiqlənib və xəstə əməliyyata alınıb: “Xəstənin törəməsi çıxarıldı. İrinlənmiş ağciyərin irinli və öz fəaliyyətini itirmiş 2 payı çıxarıldı. Əməliyyat 8 saat yarım davam etdi və uğurla nəticələndi”.
Həkim qeyd edir ki, əməliyyatdan sonra xəstənin vəziyyəti normaldır və mütamadi olaraq kontrol müayinələrə gəlir, hər hansı şikayəti qeyd olunmur.