44 günlük ikinci Qarabağ müharibəsində sarsıdıcı məğlubiyyətə uğrayan və təslim olan Ermənistanda daxili didişmələr davam edir. Virtualaz.org xəbər verir ki, bu dəfə keçmiş prezident və Qarabağ klanının liderlərindən Serj Sərkisyan danışmağa qərar verib və “kapitulyant” adı verdiyi baş nazir Nikol Paşinyana qarşı geniş müsahibələr verməyə başlayıb.

Belə müsahibələrdən birində Serj Sərkisyan iddia edib ki, 2016-cı ilin aprelində hərbi əməliyyatların dayandırılması üçün Azərbaycan xahiş etmişdi. “Çünki Azərbaycan tərəfi güclü əks-hücumla qarşılaşdı və Rusiyaya müraciət etdi ki, müharibəni dayandırsın”,-Serj Sərkisyan belə deyib.

2016-cı ilin aprelində 4 günlük müharibənin niyə dayandırıldığı əslində çoxdan bəllidir və o zaman hücumda olan, düşmənin müdafiə xəttini iki istiqamətdən yarıb əlverişli yüksəkliklərdə möhkəmlənən Azərbaycan ordusunun məhz Ermənistan rəhbərliyinin Rusiyaya yalvarışları nəticəsində dayandırıldığı haqda bir çox mötəbər rəsmilər artıq danışıblar.

İndi isə Serj Sərkisyanı Ermənistanın Təhlükəsizlik Şurasının katibi Armen Qriqoryan ifşa edib. Bildirib ki, Sərkisyan aprel müharibəsinin dayandırılmasının səbəbi barədə yalan danışır və əslində müharibə onun xahişi ilə dayandırılıb. Sərkisyan Rusiya vasitəsilə Azərbaycan prezidenti İlham Əliyevə vəd verib ki, işğal altındakı rayonların boşaldılmasına dair qrafiki təsdiq edəcək.

“Aprel müharibəsi erməni tərəfinin vədlərindən sonra dayandırıldı. Verilmiş vədlərin 2016-cı ilin yayında yerinə yetirilməsinə dair müəyyən qrafik də nəzərdə tutulurdu. Lakin həmin ilin yayında “Sasna tsrer” qiyamı baş verdi və Serj Sərkisyan bundan istifadə edərək verdiyi vədlərin yerinə yetirilməsini 2017-ci ilin aprelinə qədər, sonra isə hakimiyyətdən gedənə qədər uzatdı. Bu adam çoxsaylı vədlər verərək Ermənistanın üzərinə belə yük qoydu, sonra postunu tərk etdi və indi çıxıb deyir ki, “mən hansısa kağızı imzalamağa, hansısa addımı atmağa hazır idim”. Bununla belə mən dəqiq bəyan edirəm ki, onun verdiyi vədlər, yaratdığı dalan üzündən biz ciddi problemlərlə qarşılaşdıq”,-Qriqoryan bildirib.

Armen Qriqoryan Ermənistanın guya aprel müharibəsini udduğu haqda dediklərindən də təəcüblənir. “Sərkisyan deyir ki, güzəştə getməyə hazır idi. Lakin nəyə görə “müharibəni udduğunu” deyən adam güzəştə getməlidir? Burada nəsə düz gəlmir”,-o deyib.

Sərkisyanın aprel müharibəsindən sonra hansı vədlər verdiyinə gəlincə Qriqoryan bildirib ki, bu haqda onun özü daha dəqiq danışa bilər. “Lakin aprel müharibəsi dayandırıldı və onun ardınca qrafik nəzərdə tutulmuşdu ki, verilən vədlər, əldə olunan anlaşmalar yerinə yetirilsin. Bu vədlər Azərbaycan tərəfini qane edirdimi? Əgər Azərbaycan müharibəni dayandırmışdısa deməli vədlər onu qane edirdi”,-o vurğulayıb.