Alışanovun məhkəməsində QALMAQAL - AzTV sədri 7 milyona Şamaxıda torpaq sahələri alıb?

Baxış sayı:
547

"Azərbaycan Televiziya və Radio Verilişləri” QSC-nin sədri Arif Alışanovu öldürməyə cəhddə və külli miqdarda pulunu ələ keçirməkdə ittiham edilən şəxslərin növbəti məhkəməsi baş tutub.

Muxalifet.az xəbər verir ki, işə Bakı Ağır Cinayətlər Məhkəməsində hakim Əfqan Hacıyevin sədrliyi ilə baxılıb. Təqsirləndirilənlər Şücayət Əkbərov, Qoçəli Cəbiyev, Zöhrab Şirinov və Aqşin Hüseynovdur.

Məhkəmədə Arif Alışanovun sürücüsü Hacı Babayev ifadə verib. O, Arif Alışanov və ailə üzvləri üçün alınan torpaq sahələrinin onun adına sənədləşdirilməsi ilə bağlı suallara cavab verib. Məlum olub ki, 2 il ərzində Hacı Babayevin adına 33 alqı-satqı müqaviləsi imzalanıb.

Hacı Babayev onun adına alınan torpaq sahələrinin pulunu Arif Alışanovun verdiyini, bütün alqı-satqı müqavilələrini də təqsirləndirilən Şücayət Əkbərovun həyatı keçirdiyini deyib:"Torpağı tapan da, alan da Şücayət Əkbərov idi. Mən sadəcə notariusa gedib müqavilələrə imza atmışam. Torpaq sahəsi mənim adıma alınsa da Arif müəllim özü gedib baxırdı".

H.Babayev alınan torpaq sahələrinin Arif Alışanov tərəfindən nə məqsədlə alındığını bilmədiyini söyləyib. Vəkillərin suallarını cavablandıran H.Babayev bildirib ki, sadəcə sənədlərə imza çəkib və digər məsələlərdən xəbərsizdir. O, adına alınan 33 torpaq sahəsinin çıxarışlarının harada olmasından da xəbərsiz olduğunu qeyd edib.

Şücayət Əkbərovun vəkilləri Hacı Babayevin suallara "xatırlamıram" cavabını verməsindən narazı qalıblar. Arif Alışanovun vəkilləri isə Şücayət Əkbərovun vəkillərinə təkrar suallara görə etiraz ediblər. Bu zaman tərəflər arasında mübahisə yaranıb. Hakim tərəfləri intizama çağırıb.

Şücayət Əkbərov da Hacı Babayevə torpaq sahələrinin alınması ilə bağlı suallar verib. H.Babayev yenə də əksər suallara "xatırlamıram" deyib. Ş.Əkbərov buna etiraz edib və ona qarşı irəli sürülən ittihamların şər-böhtan olduğunu deyib: "Bunlar adam öldürüblər. Bunu da gizlətmək istəyirlər. İndi də mənə şər atırlar. Hər yerə şikayət etmişik. Nə vaxtsa hamı öz cəzasını alacaq. Arif Alşıanov 7 milyon manat pul verib. 98 alqı-satqı müqaviləsi var. Amma Hacı Babayev deyir ki, bunları xatırlamır. Axı bu, necə ola bilər?"

Məhkəmədə Arif Alışanovun qaynı Vidadi Cəfərov da ifadə verib. V.Cəfərov deyib ki, Arif Alışanova təsərrüfat qurması üçün 200 min manat verib: "2017-ci ildə öyrəndim ki, Alışanov aldadılıb".

Alışanova sui-qəsd ittihamı üzrə danışan Vidadi Cəfərov təqsirləndirilən Şücayət Əkbərovu təhqir edib: "Bu şərəfsiz Alışanovu öldürmək istəyirdi".

Bu zaman məhkəmədə tərəflər arasında mübahisə düşüb. Tərəflər bir-birini təhqir edib. Daha sonra şahid məhkəmə zalından çıxarılıb.

Digər şahid isə Etibar Bağırov olub. O da iş qurmaq üçün Arif Alışanova 1 milyon 800 min manat pul verdiyini deyib. Etibar Bağırov cüdo üzrə məşqçi olduğunu və uzin illər Belarusda ticarətlə məşğul olduğunu söyləyib. O, qeyd edib ki, Alışanova kənd təsərüfatı qurmaq üçün pul verib.

Ş.Əkbərov digər şahidlərin yalan danışmasına etiraz edib. Ş.Əkbərov şahidlərdən birinin ünvanına söyüş söyüb. Hakim Ş.Əkbərovun zaldan çıxarılacağını və prosesin onun iştirakı omadan keçiriləcəyini bildirib. Ş.Əkbərov zaldan çıxarılarkən digər iki təqsirləndirilən şəxs - Qoçəli Cəbiyev, Zöhrab Şirinov da məhkəmədə oturmaq istəmədiklərini deyiblər. Onların hər üçü zaldan çıxarılıb.

"Onsuz da mənim burda olmağımın mənası yoxdur. Bu iş ədalətsiz araşdırılır" - deyə Ş.Əkbərov zaldan çıxarılarkən bildirib.

Məhkəmə şahidlərin dindirilməsi ilə davam etdirilib.

Bildirək ki, ittiham aktında yazılır ki, Ş.Əkbərov 2013-cü ilin iyulundan 2017-ci ilin yanvarınadək olan dövr ərzində Şamaxı rayonunda və Bakı şəhərində külli miqdarda özgə əmlakını və əmlaka olan hüquqları aldatma və etibardan sui-istifadə yolu ilə ələ keçirmək məqsədilə dələduzluq edərək yaratdığı mütəşəkkil dəstə tərkibində qanunsuz silah, döyüş sursatı əldə edib saxlayaraq, daşıyıb-gəzdirib, başqa cinayəti gizlətmək məqsədilə, tamah niyyətli və sifarişlə iki və daha çox şəxsi təkrarən qəsdən öldürməyə cəhd edib. O, həmçinin A.Alışanovun 4,5 milyon manatlıq əmlakını da ələ keçirməkdə təqsirli bilinir.

Rəsmi məlumata görə, Ş.Əkbərov həmin pul vəsaitləri və əmlakları geri qaytarmaq məqsədilə yaxın münasibətlərdə olduğu Musabi Namazov, Qoçəli Cəbiyev, Zöhrab Şirinov və Aqşin Hüseynovla dələduzluq cinayət əməlini gizlətmək üçün A.Alışanovu öldürmək istəyiblər. Ş.Əkbərov bunun müqabilində dəstə üzvləri Q.Cəbiyevlə M.Namazova 600 min manat pul vəd edib.

İttihama görə, M.Namazovun dəstə üzvləri tərəfindən törədiləcək qəsdən adam öldürmə və qanunsuz silah əldə etmə, daşıma, gəzdirməklə saxlama əməlləri barəsində polis orqanlarına vaxtında məlumat verib.

Polis əməkdaşları Ş.Əkbərovu, Q.Cəbiyevi, M.Namazovu, A.Hüseynovu və Z.Şirinovu saxlayıb. Məhkəmənin qərarı ilə Ş.Əkbərov, Q.Cəbiyev, A.Hüseynov və Z.Şirinovun barəsində həbs-qətimkan tədbiri seçilib. M.Namazovun barəsində isə polisin nəzarətinə verilmə qətimkan tədbiri ilə bağlı qərar çıxarılıb.

Ş.Əkbərov Cinayət Məcəlləsinin 29,120.2.1-ci (qəsdən adam öldürməyə cəhd, bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən adam öldürməyə cəhd), 29,120.2.5-ci (tamah məqsədi ilə və ya sifarişlə, habelə zərərçəkmiş şəxsin orqanlarından və ya toxumalarından istifadə etmək məqsədi ilə adam öldürməyə cəhd), 29,120.2.6-cı (başqa cinayəti gizlətmə və ya onun törədilməsini yüngülləşdirmə məqsədi ilə, habelə zorlama və ya seksual xarakterli başqa zorakı hərəkətlərlə əlaqədar adam öldürməyə cəhd), 29,120.2.7-ci (iki və ya daha çox şəxsi öldürməyə cəhd), 29,120.2.10-cu (təkrar adam öldürməyə cəhd), 178.3.2-ci (dələduzluq, külli miqdarda törəldildikdə), 228.3-cü (qanunsuz olaraq odlu silah qurğular əldə etmə, başqasına vermə, satma, saxlama, daşıma və gəzdirmə) maddələri ilə ittiham olunur.

Digər şəxslərin barəsində isə 29,120.2.1, 29,120.2.5, 29,120.2.6, 29,120.2.7, 29,120.2.10, 228.3-cü maddələrlə ittiham irəli sürülüb./musavat.com/