Prosesdə S.Məmmədovun vəkili Cavid Rzazadə vəsatətlə çıxış edib.
Vəkil bildirib ki, təqsirləndirilən şəxslər hərbi qulluqçu olduğu üçün cinayət işinin Hərbi Məhkəməyə göndərilməsinə baxmayaraq həbs qətimkan tədbirinin Səbail Rayon Məhkəməsində seçilməsi doğru deyil: "Qanunla təqsirləndirilən şəxslər barəsində həbs qətimkan tədbiri Hərbi Məhkəmədə seçməli idi. Əgər Səbail Rayon Məhkəməsində həbs qətimkan tədbiri seçilibsə, onda cinayət işinə Bakı Bakı Ağır Cinayətlər Məhkəməsində baxılmalıdır. Mənim qaldırdığım vəsatətə hazırlıq iclasının yekununda baxılacaq".
Vəkil C.Rzazadə jurnalistlərə açıqlamasında əlavə edib ki, A.Çovdarov vəsatətə münasibət bildirərkən səhhətində problem olduğundan cinayət işi ilə tanış ola bilmədiyini deyib.
A.Çovdarovun vəkili Kamandar Nəsibov isə vəsatətlə çıxış edərək məhkəmədən vaxt istəyib. O, A.Çovdarovla yeni müqavilə bağladığını və cinayət işi ilə tanış olmadığını deyib. Vəsatət təmin edilib.
Proses oktyabrın 19-dək təxirə salınıb.
 
*   *   *15:30
 
Bu gün Sabunçu Rayon Məhkəməsində ləğv olunmuş Milli Təhlükəsizlik Nazirliyi (MTN) Energetika və Nəqliyyat Sahələrində Təhlükəsizlik Baş İdarəsinin həbsdə olan sabiq rəisi, general-mayor Akif Çovdarov, 1-ci idarənin sabiq rəisi Səlim Məmmədov, 2-ci idarənin sabiq rəisi Akif Əliyev və 3-cü idarənin 1-ci şöbəsinin sabiq rəis müavini Orxan Osmanovun cinayət işi üzrə məhkəmənin hazırlıq iclası keçirilib.
Virtualaz.org saytının məhkəmədə olan müxbiri xəbər verir ki, Akif Çovdarovun və digər keçmiş idarə rəislərinin işinə Bakı Hərbi Məhkəməsinin hakimləri baxır. Prosesə Həbib Həsənov sədrlik edir.
Prosesdə iştirak edərək baş verənləri öz mətbu orqanlarında işıqlandırmaq məqsədilə məhkəməyə gəlmiş jurnalistlər əvvəlki prosesdə olduğu kimi, içəri buraxılmayıblar.
Qeyd edək ki, təqsirləndirilən şəxslər - Akif Çovdarova Cinayət Məcəlləsinin 145.3 (Qanunsuz azadlıqdan məhrumetmə ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda), 179.3.1, 179.3.2 (Mənimsəmə və ya israfetmə mütəşəkkil dəstə tərəfindən külli miqdarda törədildikdə), 181.3.1, 181.3.2 (Quldurluq mütəşəkkil dəstə tərəfindən külli miqdarda əmlak əldə etmək məqsədilə törədildikdə), 182.3.1, 182.3.2 (Hədə-qorxu ilə tələbetmə külli miqdarda əmlak əldə etmək məqsədilə törədildikdə ), 228.4 (Qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə), 302.1, 302.2 (Gizli qaydada informasiya alınması üçün nəzərdə tutulmuş texniki vasitələrdən istifadə edilməklə əməliyyat-axtarış fəaliyyəti haqqında qanunvericiliyi pozma), 311.3.1, 311.3.2, 311.3.3, 311.3.4 (Rüşvət alma qabaqcadan əlbir olan bir qrup şəxs və ya mütəşəkkil dəstə tərəfindən hədə-qorxu tətbiq olunmaqla külli miqdarda və təkrar törədildikdə), 313 (Vəzifə saxtakarlığı), 341.2.1, 341.2.2 və 341.2.3-cü (Bir qrup şəxs tərəfindən silah tətbiq olunmaqla hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə ağır nəticələrə səbəb olduqda) maddələri, Səlim Məmmədova həmin Məcəllənin 145.3, 179.3.1, 179.3.2, 181.3.1, 181.3.2, 182.3.1, 182.3.2, 302.1, 302.2, 311.3.1, 311.3.2, 311.3.3, 311.3.4, 313, 341.2.1, 341.2.2 və 341.2.3-cü maddələri, Akif Əliyevə həmin Məcəllənin 145.3, 179.3.1, 179.3.2, 181.3.1, 181.3.2, 182.3.1, 182.3.2, 302.2, 311.3.1, 311.3.2, 311.3.3, 311.3.4, 313, 341.2.1, 341.2.2 və 341.2.3-cü maddələri və Orxan Osmanova isə həmin Məcəllənin 145.3, 181.3.1, 181.3.2, 182.3.1, 182.3.2, 302.2, 311.3.1, 311.3.2, 311.3.3, 311.3.4, 341.2.1, 341.2.2 və 341.2.3-cü maddələri ilə yekun ittihamlar irəli sürülüb.
Zərərçəkmiş şəxslərə vurulmuş ziyanın ödənilməsinin təmin olunması üçün məhkəmə qərarları əsasında təqsirləndirilən şəxslər Akif Çovdarov, Səlim Məmmədrov, Akif Əliyev və Orxan Osmanova məxsus ümumilikdə 33 milyon 466 min manat dəyərində əmlak və pul vəsaitlərinin, o cümlədən 8 milyon 967 min manat dəyərində ticarət və xidmət sahələri, istilikxanalar, balıqçılıq təsərrüfatları və sair əmlak kompleksi, torpaq sahələri, 24 milyon 445 min manat dəyərində fərdi yaşayış evləri, mənzillər, nəqliyyat vasitələri və 37 min manat dəyərində zərgərlik məmulatlarının üzərinə həbslər qoyulub.
İş üzrə 60-dan çox zərərçəkən, 320 nəfər şahid var.